मिरज : खासगी फायनान्स कंपनीचे हप्ते थकल्याचे सांगत जबरदस्तीने 8 हजार रुपये लुटणाऱ्या चौघांना महात्मा गांधी चौक पोलिसांनी अटक केली. अटक करण्यात आलेल्यांमध्ये विपुल किशोर भोरे (वय 25, रा. स्फूर्ती चौक, सांगली), अलोक परशुराम वायदंडे (19, रा. तानंग, ता. मिरज), मयुरेश दीपक मोटे (20, रा. संजयनगर, सांगली) आणि राजू मनीष परिहार (30, रा. सर्वोदय पार्किंग यार्ड, मिरज) यांचा समावेश आहे. त्यांच्याकडून सव्वादोन लाख रुपये किमतीच्या तीन दुचाकी जप्त करण्यात आल्या आहेत.
फिर्यादी शीतलकुमार माने हे दि. 21 रोजी कोल्हापूर जिल्ह्यातील शिरोली पुलाची येथून मिरजेतील शासकीय रुग्णालयात बहिणीला घेऊन उपचारासाठी निघाले होते. ते मिरजजवळ आल्यानंतर चौघांनी त्यांना अडविले. तुमच्या गाडीचे फायनान्स कंपनीचे हप्ते थकले आहेत, त्यामुळे तुमची गाडी जप्त करून ती पार्किंग यार्डमध्ये लावावी लागेल, असे सांगितले. तसेच गाडी जप्त करण्यासाठी 12 हजार रुपये द्यावे लागतील, असे सांगितले. त्यानंतर संशयितांनी शीतलकुमार माने यांच्या दुचाकीच्या नंबरप्लेटची मोडतोड केली. त्यानंतर गाडी सोडण्यासाठी पैसे द्यावे लागतील, असे सांगून ऑनलाईन 8 हजार रुपये घेतले.
याबाबत शीतलकुमार माने यांनी महात्मा गांधी चौक पोलिस ठाण्यात फिर्याद दिली होती. त्यानुसार महात्मा गांधी चौक पोलिस तपास करीत होते. खासगी फायनान्स कंपनीचे हप्ते थकल्यानंतर वाहन ओढून नेण्याचे कोणत्याही प्रकारचे अधिकार नसताना, वाहनधारकास धमकावून त्याच्याकडून चौघांनी 8 हजार रुपये घेतल्याचे निष्पन्न झाले होते. त्यामुळे चौघांना अटक करण्यात आली. त्यांच्याकडून तीन वाहने जप्त करण्यात आली आहेत.
