जत, पुढारी वृत्तसेवा : जत येथील भाजपचे माजी नगरसेवक विजय ताड यांच्या खून प्रकरणी पोलिसांनी अटक केलेल्या संशयित चार आरोपींना सोमवारी न्यायालयासमोर उभे केले असता त्यांना २७ तारखेपर्यंत पोलीस कोठडी देण्यात आली आहे. आरोपींना न्यायालयासमोर हजर करण्यात आल्याची बातमी समजताच जत कोर्टासमोर ताड समर्थक तसेच बघ्यांची प्रचंड गर्दी निर्माण झाली होती. यामुळे या ठिकाणी मोठा तणाव निर्माण झाला होता.
दरम्यान, कोर्टाने संशयित आरोपींना सात दिवसांची पोलीस कोठडी दिल्यानंतर त्यांना पोलीस बंदोबस्तात कोठडीकडे रवानगी करत असताना न्यायालयाच्या आवारात थांबलेल्या एका अज्ञात कार्यकर्त्यांने रागाच्या भरात न्यायालयाच्या समोरच बांगड्या फोडून या निर्घृण हत्येचा निषेध करण्याचा प्रयत्न केला. पोलिसांनी त्याला वेळीच ताब्यात घेऊन जत पोलीस ठाण्यात नेले. यामुळे काही वेळ वातावरण तणावपूर्ण झाले होते. पोलिसांनी आरोपींना कोर्टासमोरून बाहेर काढल्यानंतर संबंधित तरुणाला सोडून देण्यात आले.
जत पालिकेचे भाजप माजी नगरसेवक विजय ताड यांची दि. १७ मार्च रोजी जत सांगोला राष्ट्रीय महामार्गावरील अल्फोंसा स्कूल येथे गावठी पिस्तूल मधून गोळ्या झाडून व दगडाने ठेचून निर्गुण हत्या करण्यात आली होती. या घटनेने संपूर्ण तालुका हादरला होता. हा खून कोणत्या कारणातून झाला याबाबत वेगवेगळे तर्कवितर्क लढवले जात होते, तसेच आरोपीच्या मुसक्या आवळणे देखील पोलिसांसमोर मोठे आव्हान होते. जिल्हा पोलीस प्रमुख यांनी घटनेचे गांभीर्य ओळखून हा तपास स्थानिक गुन्हे अन्वेषण विभागाकडे सोपवला होता.
रविवारी रात्री उशिरा या खून प्रकरणी चार संशयित आरोपींना कर्नाटकातील गोकाक येथून ताब्यात घेण्यात आले होते . त्यानंतर सोमवारी सकाळी पोलीस प्रमुखांनी पत्रकार बैठक घेत चारही आरोपींची नावे निष्पन्न करून यात मुख्य सूत्रधार म्हणून माजी नगरसेवक उमेश सावंत यांचा सहभाग असल्याचे स्पष्ट केले. त्यानंतर आरोपी संदीप उर्फ बबलू चव्हाण, किरण चव्हाण, आकाश व्हणकांडे , निकेश उर्फ दादा मदने यांना जत न्यायालयासमोर उभे केले असता कोर्टाने त्यांना सात दिवसांची पोलीस कोठडी सुनावली. याप्रकरणी आरोपींच्या वतीने जत येथील वकील ए. जी. रेऊर व सुप्रभा महाजन यांनीही काम पाहिले.
