आटपाडी: पुढारी वृत्तसेवा : झरे (ता. आटपाडी) येथे भरधाव टँकरने दोन महिलांना उडविले. दोन दुचाकींचा चुराडा केला. या अपघातात संगीता प्रकाश पवार (वय ४५, रा. तरसवाडी, ता. खटाव, जि. सातारा) यांचा मृत्यू झाला. तर राणी सुरेश पवार (रा. झरे, ता. आटपाडी) या गंभीर जखमी झाल्या आहेत. कराड – पंढरपूर रस्त्यावर झरे येथील मुख्य चौकात आज (दि. २७) सकाळी ही दुर्घटना घडली.
याबाबत अधिक माहिती अशी की, झरे येथे भरधाव आलेल्या टँकर (एम एच ५० ८८८८) चालकाचा वाहनावरील ताबा सुटला. त्यानंतर टँकरने पारेकरवाडीचे मंगेश धोंडीराम दगडे यांच्या दुचाकीचा चुराडा केला. पालीच्या खंडोबाला जाण्यासाठी पती सुरेश पवार यांची वाट पाहत रस्त्यालगत थांबलेल्या त्यांची पत्नी राणी पवार यांना टँकरने उडविले. त्या गंभीर जखमी झाली. दरम्यान, नारायण सकट या नातलगांना भेटून प्रकाश जयवंत पवार व त्यांची पत्नी संगीता हे दोघे घरातून बाहेर पडले होते. नारायण सकट व प्रकाश पवार हे दोघे बोलत होते. रस्त्यालगत टीव्हीएस लुनाजवळ पतीची वाट पाहणाऱ्या संगीता पवार यांना टँकरने उडविले. या धडकेत त्या सुमारे १०-१५ फूट उंच उडाल्या. त्या गंभीर जखमी झाल्याने त्यांचा जागीच मृत्यू झाला.
या घटने दरम्यान चौदा चाकी टँकरच्या मागील दोन चाकाची जोडी ट्रकच्या जॉईंटमधून निसटली. ती वेगाने सचिन राजमाने यांच्या दुकानाच्या समोरील ब्रह्मचैतन्य चहा सेंटरच्या पाठीमागील दगडी भिंतीला जाऊन धडकली. त्यामुळे ही भिंत कोसळली. या अपघातानंतर टँकर चालकाने कराड पंढरपूर रस्त्याने शेनवडी (ता. माण) च्या दिशेने पळ काढला. गावातील तरुणांनी पाठलाग करून चालकाला पकडून पोलिसांच्या ताब्यात दिले.
कराड – पंढरपूर रस्त्यावर झरे आणि विभूतवाडी येथे वारंवार अपघात होत आहेत. या अपघातात अनेकांना प्राण गमवावे लागले आहेत. या रस्त्यावर सार्वजनिक बांधकाम विभागाने गतिरोधक करावेत, अशी मागणी होत आहे.
हेही वाचा :
