कोकरूड : पुढारी वृत्तसेवा
बिळाशी (ता. शिराळा) येथे मुलीच्या लग्नाचे दागिने बनविण्यासाठी दिलेली 13 लाख 50 हजार रुपयांची रक्कम घेऊन सराफाने पलायन केले. याप्रकरणी बाळू ज्ञानू पाटील (रा. बिळाशी) यांनी कोकरूड पोलिस ठाण्यात फिर्याद दिली. त्यावरून सराफ आनंदा ऊर्फ नागेश हनुमंत पोतदार (रा. बिळाशी) याच्याविरोधात गुन्हा दाखल झाला. फसवणुकीचा हा प्रकार 26 एप्रिल 2022 ते सप्टेंबर 2024 या कालावधीत घडला.
याबाबत पोलिसांकडून मिळालेली माहिती अशी, बाळू पाटील हे शेती करतात. त्यांनी मुलीच्या लग्नात दागिने करण्यासाठी नागेश याला 13 लाख 50 हजार रुपये दिले होते. मात्र, काही दिवसांपासून नागेश हा त्यांना दागिने देण्यास टाळाटाळ करत होता. तसेच पैशाची मागणी केली असता उडवाउडवीची उत्तरे देत होता. बाळू पाटील त्याच्या घराकडे गेले असता, त्याचे घर बंद होते. त्याचा मोबाईलही बंद होता. त्यानंतर पाटील यांनी याबाबत फिर्याद दिली.
