कवठेमहांकाळ; गोरख चव्हाण : जिल्ह्यात सर्वत्र ख्याती असलेला, एक दिवसाचा पिकनिक स्पॉट म्हणून पर्यटकांना खुणावत असलेला मिरज आणि कवठेमहांकाळ तालुक्याच्या सीमेवरील दंडोबा डोंगराने जणू हिरवाईचा शालू नेसला आहे. या सार्या डोंगरावर हिरवाई पसरली आहे. हिरवाईचा माहोल सजला आहे. पर्यटकांची वर्दळ सुरू झाली आहे. ट्रेकिंग, पर्यटनासाठी सर्वांना भुरळ घालणारा हा परिसर लक्षवेधी ठरत आहे.
तब्बल पाच ग्रामपंचायतींच्या हद्दीत असलेला दंडोबा डोंगर 1150 हेक्टरवर पसरला आहे. डोंगरावर अनेक विविध पक्षी, प्राणी आढळतात. डोंगरावर दंडनाथाचे मंदिर आहे. परिसरासह जिल्ह्यात हे भाविक जागृत देवस्थान मानतात. डोंगरावर जाण्यासाठी पक्की सडक आहे. या ऐतिहासिक डोंगरावर सुमारे दोनशे वर्षांपूर्वीपासून असलेले शिखर ही दंडोबाची ओळख आहे.पाच गावच्या हद्दीत दंडनाथाचे मंदिर डोंगराचे खास वैशिष्ट्य आहे. मंदिरात प्राचीन गुंफा आहे. श्रावणाच्या तिसर्या, चौथ्या सोमवारी यात्रा भरते. मंदिरासमोर सभामंडप आहे.
विस्तीर्ण क्षेत्रावर पसरलेल्या दंडोबावर ट्रेकिंग करण्यासाठी संधी असून अनेकवेळा ट्रेकिंगसाठी येथे तरुण गर्दी करत आहेत. काही दिवसांपूर्वीच सोळा वषार्ंनंतर दंडोबा राज्यस्तरीय क्रॉसकंट्री स्पर्धा झाल्या. स्पर्धेमुळे ग्रामीण तसेच शहरातील भागातील मुलांना या निमित्ताने त्यांच्या सुप्तगुणांना वाव मिळत आहे. श्रावण सुरू झाल्याने डोंगरावर पर्यटकांची, भाविकांची गर्दी वाढत आहे.
कसे जाल : सांगली ते खरशिंग फाटा ते दंडोबा डोंगर – 40 कि.मी. (रत्नागिरी-नागपूर राष्ट्रीय महामार्ग), मिरज ते खरशिंग फाटा ते दंडोबा डोंगर – 30 कि.मी. (रत्नागिरी-नागपूर राष्ट्रीय महामार्ग), कवठेमहांकाळ ते खरशिंग ते दंडोबा डोंगर – 18 कि.मी. चित्रीकरण स्पॉट : डोंगरावर काही मराठी चित्रपटांचे चित्रीकरण झाले. कुटुंबीयांसह एक दिवसाचे भ्रमंतीचे ठिकाण म्हणजे दंडोबा डोंगर. तर ट्रेकिंगची वेगळीच अनुभूती देणारा दंडोबा डोंगर ठरू लागला आहे.
