तळा : तळा तालुका हा वनसंपदेने नटलेला तालुका आहे. तेथे प्रत्येक ऋतूमध्ये वेगवेगळ्या प्रकारची फळ व फुले येतात. आता तर पळसाची झाडे हि नारंगी फुलांनी बहरलेली दिसत आहेत. रानमाळावर हे पळसाचे झाड नारिंगी फुलांनी बहरलेले बघुन वृक्षप्रेमी त्या झाडाकडे आकर्षित होतात.व आपल्या कॅमेऱ्यात नारंगी फुलांची जणू उधळण केलेल्या झाडाचे फोटो काढतात.
पळस हि एक आयुर्वेदिक औषधी वनस्पती आहे. या झाडाच्या पानांचा आकार हा तळहाता एवढा रुंद व जाड असतो. त्यांचा वापर पत्रावळी करण्यासाठी करतात. पूर्वी मोठमोठ्या कार्यक्रमात या पानांपासून बनविलेल्या पत्रावळीचा वापर होत होता.
परंतू आता यूज ॲण्ड थ्रोचा फॅड असल्यामुळे ह्या पानांपासून बनविलेल्या पत्रावळी नामशेष होण्याच्या मार्गावर आहेत. परंतु तळा तालुक्यातील काही गावात आजही या पानांच्या पत्रावळी बनवितात. याच्या फुलांचा वापर पुर्वी रंग बनविण्यासाठी करत होते. याच्या बिया खुप कडू असतात. त्याला पळसपापडी.म्हणतात त्याचा औषधी उपयोग आहे. असे जुने जाणकार सांगतात.
