रायगड दर्शनावरून परतताना पुनाडे घाटात टेम्पो ट्रॅव्हलरचा अपघात
ब्रेक फेल झाल्याने अवघड वळणावर वाहन उलटले
१८ प्रवाशांपैकी ५ जखमी; ३ जण माणगाव रुग्णालयात दाखल
पाचाड प्राथमिक आरोग्य केंद्रात तातडीने उपचार
किल्ले रायगड हॉटेल व्यवसायिक संघटनेने मदतीसाठी धाव घेतली
नाते – इलियास ढोकले
रायगड किल्ल्याचे दर्शन घेऊन परत जात असताना अहिल्यानगर येथील शिवभक्तांच्या टेम्पो ट्रॅव्हलरचा रायगडजवळील पुनाडे घाटात भीषण अपघात झाला. अवघड वळणावर टेम्पो ट्रॅव्हलरचा ब्रेक फेल झाल्याने वाहन उलटले. या अपघातात प्रवास करणाऱ्या १८ प्रवाशांपैकी पाच जण किरकोळ जखमी झाले असून त्यातील तिघांना पुढील उपचारासाठी माणगाव येथील ग्रामीण रुग्णालयात हलवण्यात आले आहे.
अहिल्यानगर येथून एमएच १२ एमएच ६७६३ क्रमांकाच्या टेम्पो ट्रॅव्हलरमधून १८ शिवभक्त रायगड किल्ल्याच्या दर्शनासाठी आले होते. दर्शन आटोपून सायंकाळी हे शिवभक्त माणगाव मार्गे पुण्याकडे परतीच्या प्रवासाला निघाले असताना रायगड–माणगाव रस्त्यावरील पुनाडे घाटात अवघड वळणावर अचानक टेम्पो ट्रॅव्हलरचा ब्रेक फेल झाला.
ब्रेक फेल झाल्यामुळे चालकाला वाहनावरील नियंत्रण मिळवता आले नाही आणि टेम्पो उलटून अपघात घडला. सुदैवाने या अपघातात कोणतीही जीवितहानी झाली नाही. मात्र पाच प्रवासी जखमी झाले. त्यांना तातडीने पाचाड येथील प्राथमिक आरोग्य केंद्रात दाखल करण्यात आले.
जखमी झालेल्यांमध्ये राहुल नागरे, अमोल फडतरे आणि आसाराम तोगे या तीन शिवभक्तांचा समावेश असून त्यांना पुढील उपचारासाठी माणगाव येथील ग्रामीण रुग्णालयात हलवण्यात आले आहे, अशी माहिती महाड तालुका पोलीस ठाण्याचे पोलीस हवालदार मोरे यांनी दिली. उर्वरित जखमी शिवभक्तांवर पाचाड येथील प्राथमिक आरोग्य केंद्रात किरकोळ उपचार करण्यात आले.
या घटनेची माहिती मिळताच किल्ले रायगड हॉटेल व्यवसायिक संघटनेचे अध्यक्ष रघुवीर देशमुख, शिराज सय्यद तसेच संघटनेचे इतर पदाधिकारी तातडीने घटनास्थळी दाखल झाले. त्यांनी जखमी शिवभक्तांच्या उपचारासाठी मदत केली. रात्रीचा अंधार लक्षात घेता शिवभक्तांसाठी जेवण, चहा आणि नाश्त्याची व्यवस्था देखील किल्ले रायगड हॉटेल व्यवसायिक संघटनेच्या पदाधिकाऱ्यांनी केली.
