महादेव सरसंबे
रोहे: यावर्षी पाऊस उशिरा झाला असला तरी रायगड जिल्ह्यात चांगला पाऊस पडला आहे. त्यामुळे रायगड जिल्ह्यातील धरणक्षेत्रात चांगला पाणीसाठा असून रायगड जिल्ह्यातील २८ धरणक्षेत्रात ९६.५५ टक्के पाणीसाठा उपलब्ध झाला आहे.
रायगड जिल्ह्यातील रायगड पाटबंधारे विभाग कोलाड अंतर्गत २८ धरणापैकी २० धरणे १०० टक्के भरली आहेत. उर्वरित ८ धरणापैकी सर्वात कमी पाणीसाठा श्रीवर्धन तालुक्यातील रानीवली धरणक्षेत्रात ५१ टक्के पाणीसाठा उपलब्ध आहे.
त्यानंतर श्रीवर्धन तालुक्यातील कार्ले धरणक्षेत्रात ६३ टक्के, अलिबाग तालुक्यातील श्रीगाव धरणक्षेत्रात ९६ टक्के व उर्वरित महाड तालुक्यातील वरंध धरणक्षेत्रात ९९ टक्के, खैरे धरणक्षेत्रात ९९ टक्के, कर्जत तालुक्यातील साळोख धरणक्षेत्रात ९९ टक्के, अवसरे धरणक्षेत्रात ९९ टक्के पनवेल तालुक्यातील बामणोली धरणक्षेत्रात ९९ टक्के पाणीसाठा उपलब्ध आहे.
२८ धरणक्षेत्रात पाणीसाठा पहाता मुरुड तालुक्यातील फणसाड, तळा तालुक्यातील वावा, रोहा तालुक्यातील सुतारवाडी, पेण तालुक्यातील आंबेघर, अलिबाग तालुक्यातील श्रीगाव, सुधागड तालुक्यात कोंडगाव, घोटवडे, ढोकशेत, कवेळे, उन्हेरे ही धरणे जवळजवळ शंभर टक्के भरली आहे. श्रीवर्धन तालुक्यातील कार्ले ६३ टक्के, कुडकी १०० टक्के, रानीवली ५१ टक्के, म्हसळा तालुक्यातील पाभरे टक्के, संदेरी १०० टक्के, महाड तालुक्यातील वरंध ९९ टक्के, खिंडवाडी १०० टक्के तर उर्वरित धरणांमध्येही मुबलक पाणीसाठा आहे.
मात्र पावसाची दिर्घ विश्रांती आणि तीव्र उन्हाळ्यामुळे पाण्याचे बाष्पीभवन वाढत असून पाणी साठ्यावर त्याचा परिणाम होण्याची शक्यता आहे.
