Birwadi Unseasonal Rain
महाड : मागील महिनाभरापासून वाढलेल्या उष्णतेने त्रस्त झालेल्या बिरवाडी परिसराला गुरुवारी (दि. ७) अचानक आलेल्या अवकाळी वादळी पावसाने जोरदार झोडपले. या वादळी पावसामुळे खरवली आणि सोलम कोंड परिसरातील पाच नागरिकांच्या घरांचे अंशतः नुकसान झाल्याची माहिती महाड तहसील कार्यालयाच्या आपत्ती व्यवस्थापन विभागाकडून देण्यात आली आहे.
या घटनेची गंभीर दखल घेत तहसीलदार महेश शितोळे यांनी नुकसानग्रस्त घरांचे तातडीने पंचनामे करण्याचे आदेश संबंधित यंत्रणेला दिले असल्याचे सांगितले.
सायंकाळी साडेचारच्या सुमारास परिसरात अचानक जोरदार वादळी वाऱ्याला सुरुवात झाली. काही वेळातच या वाऱ्याने अवकाळी पावसाचे स्वरूप घेतल्याने नागरिकांची तारांबळ उडाली. या वादळात मौजे खरवली येथील प्रवीण नामदेव दशगोंकार यांच्या घराचे छप्पर उडून गेले.
तसेच सोलम कोंड येथील कृष्णा पवार, भालचंद्र साळुंके, सुरेश राखाडे आणि प्रमिला सुतार यांच्या घरांचे अंशतः नुकसान झाल्याची माहिती प्रशासनाकडून देण्यात आली आहे.
दरम्यान, महाड शहरातही सायंकाळी अचानक आलेल्या वादळी वाऱ्यामुळे बाजारपेठेत खरेदीसाठी आलेल्या नागरिकांची एकच धावपळ उडाली. सुरक्षिततेच्या कारणास्तव सुरू असलेल्या विविध कामांसह वीज वितरण विभागाने खबरदारीचा उपाय म्हणून काही काळ विद्युत पुरवठा बंद ठेवला होता. सायंकाळी सहानंतर वीजपुरवठा पूर्ववत करण्यात आल्याची माहिती महावितरणकडून देण्यात आली.
प्रशासनाच्या माहितीनुसार, वृत्त लिहितेवेळी खरवली आणि सोलम कोंड वगळता महाड तालुक्यात अन्य ठिकाणी कोणत्याही मोठ्या नुकसानीची नोंद झालेली नव्हती.
