पनवेल : कमी पर्जन्यमान आणि एल निनोच्या प्रभावामुळे उपलब्ध जलस्रोतांचे योग्य व्यवस्थापन करण्यासाठी महाराष्ट्र शासनाच्या निर्देशानुसार महाराष्ट्र औद्योगिक विकास महामंडळाकडून (एमआयडीसी) तळोजा नोडचा पाणीपुरवठा ३६ तासांसाठी बंद ठेवण्यात येणार आहे. गुरुवार, २२ ऑक्टोबर रोजी मध्यरात्री १२ वाजल्यापासून शनिवार, २४ ऑक्टोबर रोजी दुपारी १२ वाजेपर्यंत ही पाणीपुरवठा बंदची कालावधी राहणार आहे.
या निर्णयामुळे शुक्रवार, २३ ऑक्टोबर आणि शनिवार, २४ ऑक्टोबर रोजी तळोजा नोडमधील नागरिकांना पाणीटंचाईचा सामना करावा लागण्याची शक्यता आहे. उपलब्ध पाणीसाठ्याचे योग्य नियोजन करून ऑगस्ट २०२७ पर्यंत जलस्रोतांचे व्यवस्थापन करण्याच्या उद्देशाने ही खबरदारी घेण्यात येत असल्याचे एमआयडीसीकडून कळविण्यात आले आहे.
सिडको प्रशासनाने यासंदर्भात नागरिकांना सूचना दिल्या आहेत. पाणीपुरवठा बंद राहण्याच्या कालावधीचा विचार करून आवश्यक तेवढा पाणीसाठा आधीच करून ठेवावा, तसेच उपलब्ध पाण्याचा काटकसरीने वापर करावा, असे आवाहन केले आहे. पाणीपुरवठा पूर्ववत होईपर्यंत नागरिकांनी पाण्याचा अपव्यय टाळून सहकार्य करावे, असेही प्रशासनाने स्पष्ट केले आहे.
पाणीपुरवठा बंद राहणार असल्याने तळोजा नोडमधील रहिवासी, सोसायट्या आणि व्यावसायिक आस्थापनांनी पाण्याचे नियोजन करणे आवश्यक आहे. या कालावधीत होणाऱ्या गैरसोयीबद्दल सिडको प्रशासनाने दिलगिरी व्यक्त केली आहे.
