पनवेल : शहरालगतच्या पेशवे कालीन वडाळे तलावात हिवाळ्याच्या दिवसांत स्थलांतरित पक्ष्यांचे आगमन झाले असून निसर्गप्रेमींमध्ये आनंदाचे वातावरण आहे. यंदाही हजारो किलोमीटरचा प्रवास करून या बदकांनी तलाव परिसर गजबजून टाकला आहे.
तलावातील पाणवनस्पतींमध्ये थव्याने वावरत असलेली ही बदके नागरिकांचे लक्ष वेधून घेत आहेत.पहाटे व संध्याकाळी त्यांचा वावर अधिक दिसून येत असल्याने पक्षी निरीक्षकांसाठी हा परिसर आकर्षणाचे केंद्र ठरत आहे.
दरवर्षीप्रमाणे यंदाही या पक्ष्यांचे आगमन हे पर्यावरण संतुलनाचे सकारात्मक संकेत मानले जात आहेत. मात्र तलावातील वाढते प्रदूषण आणि मानवी हस्तक्षेप यामुळे त्यांच्या अधिवासावर परिणाम होण्याची भीती व्यक्त होत आहे. त्यामुळे या ऐतिहासिक वडाळे तलावाचे संवर्धन आणि स्वच्छता राखण्याची गरज स्थानिकांकडून व्यक्त केली जात आहे.
