नेरळ: माथेरान-नेरळ घाटमार्गावरील जुम्मापट्टी येथील एस पॉईंट परिसरात सोमवारी २७ जुलै दुपारी सुमारे २. ५७ वाजण्याच्या सुमारास झालेल्या कार अपघातात दोन जण किरकोळ जखमी झाले आहे. वाहनाचेही नुकसान झाले आहे. याप्रकरणी नेरळ पोलिसांनी निष्काळजीपणे वाहन चालविल्याप्रकरणी चालकाविरोधात गुन्हा दाखल केला आहे.
पोलिसांनी दिलेल्या माहितीनुसार, उल्हासनगर येथील रहिवासी असलेला चालक त्याच्या ताब्यातील होंडा ऑरा ही कार माथेरानच्या दिशेने नेरळकडे माथेरान घाट रस्त्यावरून जात असताना, नेरळ जुम्मापट्टी येथील एस पॉईंट जवळील घाटातील उतारावरील वळणावर आल्यानंतर चालकाने रस्त्याच्या परिस्थितीकडे दुर्लक्ष करून निष्काळजीपणे वाहन चालविल्याने त्याचा गाडीवरील ताबा सुटला.
त्यानंतर कार रस्त्याच्या डाव्या बाजूला असलेल्या सिमेंटच्या डिव्हायडरवर आदळून अपघात झाल्याची घटना घडली असल्याचे समोर आले आहे. या अपघातात कारमधील दोन प्रवाशांना किरकोळ दुखापत झाली असून वाहनाचेही नुकसान झाले आहे.
या प्रकरणी नेरळ पोलीस ठाण्यात चालका विरोधात गुन्हा दाखल करण्यात आला आहे. या प्रकरणाचा पुढील तपास हा नेरळ पोलीस ठाण्याचे पोलीस नाईक साळुंखे हे करीत आहेत.
