पनवेल: कामोठे परिसरात इमारतींचे छत कोसळण्याच्या घटनांमध्ये सातत्याने वाढ होत असून नागरिकांच्या सुरक्षिततेचा प्रश्न ऐरणीवर आला आहे. आतापर्यंत परिसरात छत कोसळण्याच्या चार घटना घडल्या असून त्यामध्ये एका व्यक्तीचा मृत्यू झाला आहे, तर एका मुलीला गंभीर दुखापत झाली आहे. या घटना ताज्या असतानाच धरती व्हिला सोसायटीतही छताचा काही भाग कोसळल्याची घटना समोर आली असून रहिवाशांमध्ये भीतीचे वातावरण निर्माण झाले आहे.
धरती व्हिला सोसायटीतील अनेक ठिकाणी छताला मोठ्या प्रमाणात गळती होत होती. त्यानंतर छताचा काही भाग कोसळल्याने इमारतीच्या सुरक्षिततेबाबत गंभीर प्रश्न उपस्थित झाले आहेत. सुदैवाने या घटनेत कोणतीही जीवितहानी झाली नाही.
मात्र, इमारतीची अवस्था अत्यंत धोकादायक बनली याशिवाय सोसायटीच्या मागील खाडी परिसरातून साप व इतर सरपटणाऱ्या प्राण्यांचा वावर वाढला असून परिसरात साचलेल्या कचऱ्यामुळे अस्वच्छतेचाही प्रश्न निर्माण झाला आहे. त्यामुळे रहिवाशांमध्ये भीती आणि नाराजीचे वातावरण आहे.
या सर्व बाबींची नगरसेवक विकास घरत यांनी प्रत्यक्ष पाहणी करून संबंधित प्रशासनाच्या निदर्शनास आणून देत इमारतीचे परिसराची स्वच्छता, खाडी परिसरातील झाडाझुडपांची साफसफाई आणि साप व इतर सरपटणाऱ्या प्राण्यांच्या प्रतिबंधासाठी त्वरित उपाययोजना कराव्यात, अशा सूचना अधिकाऱ्यांना दिल्या आहे.
कामोठ्यात वारंवार घडणाऱ्या छत कोसळण्याच्या घटनांमुळे जुन्या इमारतींच्या सुरक्षिततेचा प्रश्न पुन्हा ऐरणीवर आला असून, प्रशासनाने तातडीने धोकादायक इमारतींचे सर्वेक्षण करण्याची मागणी आहे.
