उरण: राज्यभरात लागू असलेल्या पावसाळी मासेमारी बंदी आदेशाचे उल्लंघन करून बेकायदेशीरपणे मासेमारीसाठी जाण्याच्या तयारीत असलेल्या दोन नौकांवर उरण मत्स्यव्यवसाय विभागाने मोठी कारवाई केली आहे. या दोन्ही नौका तात्काळ ताब्यात घेऊन करंजा-नवापाडा बंदरात अवरुद्ध करण्यात आल्या आहेत.
मिळालेल्या माहितीनुसार, ससून डॉक (मुंबई) येथे नोंदणीकृत असलेल्या 'आई भवानी' मालक - गणेश लालू राठोड, कफ परेड, मुंबई आणि 'लक्ष्मी नारायण' मालक - विनोद नरेश राठोड, कफ परेड, मुंबई) या दोन मासेमारी नौका रात्रीच्या अंधाराचा फायदा घेत अंबुजा सिमेंट कंपनीजवळील खाडीत उभ्या होत्या. एका बर्फाच्या गाडीतून या नौकांमध्ये बर्फ भरून त्या पावसाळी बंदीच्या काळात बेकायदेशीरपणे समुद्रात मासेमारीसाठी जाण्याच्या तयारीत होत्या.
या प्रकाराची माहिती मिळताच उरणचे परवाना अधिकारी सुरेश शंकरराव बावूलगावे यांनी तीन सागरी सुरक्षा रक्षकांसह तात्काळ घटनास्थळी धाव घेत छापा टाकला आणि दोन्ही नौकांवर कारवाई केली. महाराष्ट्र सागरी मासेमारी नियमन अधिनियम १९८१ व २०२१ अंतर्गत ही धडक कारवाई करण्यात आली आहे.
दोन्ही नौका करंजा-नवापाडा बंदरात रोखून ठेवण्यात आल्या असून, या कारवाईचा सविस्तर अहवाल रायगड-अलिबागचे सहाय्यक आयुक्त तथा अभिनिर्णय अधिकारी यांच्याकडे पुढील कायदेशीर कारवाईसाठी सादर केला जाणार असल्याची माहिती परवाना अधिकारी सुरेश बावूलगावे यांनी दिली.
