महाड : महाराष्ट्र औद्योगिक विकास महामंडळ, महाड येथील कार्यालयात नोकरी मिळवण्यासाठी बनावट प्रमाणपत्र सादर केल्याचा प्रकार उघडकीस आला असून, याप्रकरणी महाड एमआयडीसी पोलीस ठाण्यात एकावर गुन्हा दाखल करण्यात आला आहे. हा प्रकार फेब्रुवारी 2023 ते 13 मार्च 2025 या कालावधीत एमआयडीसी महाड येथील यांत्रिकी विभाग कार्यालयात घडल्याचे तपासात समोर आले आहे.
या प्रकरणी सहाय्यक क्षेत्र व्यवस्थापक यांनी दिलेल्या फिर्यादीवरून रामदास पांडुरंग सावंत, रा. एमआयडीसी कर्मचारी वसाहत, नांगलवाडी, महाड (मूळ राहणार वेंगुर्ला, जि. सिंधुदुर्ग) याच्याविरोधात भारतीय न्याय संहिता 2023 मधील कलम 336(2), 336(3) आणि 340(2) अंतर्गत गुन्हा दाखल करण्यात आला आहे.
आरोपीने लिपिक-टंकलेखक पदावर नोकरी मिळवण्यासाठी बनावट प्रमाणपत्र सादर केले होते. हे प्रमाणपत्र शासकीय वाणिज्य प्रमाणपत्र परीक्षा (जीसीसी) नोव्हेंबर 1994 मधील मराठी टंकलेखन 30 शब्द प्रति मिनिट या विषयाचे असल्याचे दाखविण्यात आले होते,मात्र तपासात हे प्रमाणपत्र खोटे व बनावट असल्याचे निष्पन्न झाले आहे.
या प्रकरणाचा पुढील तपास महाड एमआयडीसी पोलीस ठाण्याचे सहाय्यक पोलीस निरीक्षक जीवन माने यांच्या मार्गदर्शनाखाली पोलीस उपनिरीक्षक व्ही. बी. फडतरे करीत आहेत.
