पोलादपूर : आंबेनळी घाट पुन्हा एकदा गंभीर गुन्हेगारी घटनेमुळे चर्चेत आला आहे. पोलादपूर तालुक्याच्या हद्दीतील बावली टोक ते दाभिल टोक दरम्यान खोल दरीमध्ये एका वृद्ध महिलेचा मृतदेह आढळून उळून आल्याने खळबळ उडाली आहे.
अलिबाग येथील एका युवकाने स्वतःच्या चुलत मावशीचा खून करून तिचा मृतदेह आंबेनळी घाटातील खोल दरीत फेकून दिल्याची धक्कादायक माहिती समोर आली आहे. अनदर्श हिराजी शेडगे वय ३२ रितेश नरेश लोहार वय २० दोन्ही रा. तिनवीरा अशी आरोपींची आहेत. सुनंदा लक्ष्मण पाटील (वय ८५ रा. सारळ आदिवासीवाडी) असे मृत महिलेचे नाव आहे.
संबंधित युवकाने दोन दिवसांपूर्वी खून केल्यानंतर पुरावा नष्ट करण्याच्या उद्देशाने मृतदेह आंबेनळी घाटातील खोल दरीमध्ये फेकून दिला होता. या प्रकरणाचा तपास करताना अलिबाग पोलिसांनी संशयित युवक अनदर्श चिराशी शेडगे, रा. तीनवीरा याला ताब्यात घेतले. चौकशीदरम्यान त्याने गुन्ह्याची कबुली दिली असून मृतदेह ज्या ठिकाणी फेकून दिला होता ते ठिकाणही पोलिसांना दाखवले. यामध्ये त्याच्या मित्राचाही समावेश आहे.
या संपूर्ण घटनेमुळे परिसरात एकच खळबळ उडाली असून आंबेनळी घाट पुन्हा एकदा चर्चेचा विषय ठरला आहे. काही दिवसांपूर्वीच या घाटात भीषण अपघात होऊन आठ युवकांचा मृत्यू झाला होता. त्या घटनेची आठवण अद्याप ताजी असतानाच आता खून प्रकरण समोर आल्याने नागरिकांमध्ये भीतीचे वातावरण निर्माण झाले आहे.
विशेष म्हणजे यापूर्वीही आंबेनळी घाटातील याच परिसरात एका महिलेचा मृतदेह कुजलेल्या अवस्थेत सापडल्याची घटना घडली होती. त्यामुळे हा परिसर पुन्हा एकदा गूढ आणि गंभीर घटनांमुळे चर्चेत आला आहे. प्रकरणाचा पुढील तपास मांडवा पोलीस ठाण्याचे पोलीस निरीक्षक सोमनाथ लांडे हे करत आहेत.
प्रतापगड सर्च अँड रेस्क्यू टीमची मदत
यानंतर अलिबाग पोलिसांचे पथक घटनास्थळी दाखल झाले. आंबेनळी घाटातील धोकादायक आणि अतिशय खोल दरीमुळे मृतदेह बाहेर काढण्याचे मोठे आव्हान निर्माण झाले होते. यावेळी प्रतापगड सर्च अँड रेस्क्यू टीम तसेच महाबळेश्वर ट्रेकर्सच्या जवानांनी धाडसी रेस्क्यू मोहीम राबवत खोल दरीत उतरून मृतदेह बाहेर काढण्यात यश मिळवले. या मोहिमेदरम्यान मोठी खबरदारी घेण्यात आली.
