रोहे : मध्य रेल्वेने, आपल्या मौल्यवान प्रवाशांना सुरक्षित, सुलभ आणि आरामदायक प्रवासाचा अनुभव देण्याच्या आपल्या दृढ वचनबद्धतेनुसार, आपल्या संपूर्ण नेटवर्कवर अनधिकृत आणि विनातिकीट प्रवासाला आळा घालण्यासाठी आपले प्रयत्न तीव्र केले आहेत. तीव्र आणि पद्धतशीर तिकीट तपासणी मोहिमेद्वारे, मध्य रेल्वेने एप्रिल 2026 मध्ये लक्षणीय परिणाम साधले आहेत.
एप्रिल 2026 या महिन्यात, मध्य रेल्वेच्या तिकीट तपासणी पथकांनी विनातिकीट, अयोग्य किंवा अवैध प्रवास परवानगीने प्रवास करणाऱ्या 4.96 लाख प्रवाशांना पकडले आहे. गेल्या वर्षी एप्रिलमध्ये ही संख्या 4.04 लाख होती, म्हणजेच जवळपास 23% वाढ झाली आहे.
एप्रिल 2026 मध्ये दोषींकडून दंड म्हणून 40.85 कोटी रुपये वसूल करण्यात आले आहेत, तर गेल्या वर्षी एप्रिलमध्ये ही रक्कम 25.03 कोटी रुपये होती, म्हणजेच 63% पेक्षा जास्त वाढ झाली आहे. एप्रिल 2026 दरम्यान तिकीट/ वैध तिकीटाशिवाय प्रवास करताना पकडलेल्या प्रवाशांचा विभागनिहाय तपशील मध्ये त्यांच्याकडून वसूल केलेली दंडाची रक्कम पहाता मुंबई विभाग 2.27 लाख प्रकरणांमधून रु. 16.13 कोटी, भुसावळ विभाग 1.09 लाख प्रकरणांमधून रु. 12.23 कोटी, पुणे विभाग 0.52 लाख प्रकरणांमधून रु. 4.54 कोटी, नागपूर विभाग 0.58 लाख प्रकरणांमधून रु. 3.92 कोटी, सोलापूर विभाग 0.25 लाख प्रकरणांमधून रु. 1.45 कोटी आणि मुख्यालय 0.26 लाख प्रकरणांमधून रु. 2.58 कोटी एवढे दंड वसूल केले आहे.
मेल आणि एक्सप्रेस गाड्यांव्यतिरिक्त, मुंबई आणि पुणे विभाग त्यांच्या नेटवर्कवर उपनगरीय गाड्या देखील चालवतात. मुंबई विभागात दररोज 1820 उपनगरीय सेवा चालतात, ज्यात 108 वातानुकूलित लोकल सेवांचा समावेश आहे, तर पुणे विभागात दररोज 40 उपनगरीय सेवा चालतात. मुंबई विभागात, आढळलेल्या एकूण 2.27 लाख प्रकरणांपैकी, 1.34 लाख उपनगरीय प्रकरणे आहेत, तर 93,524 प्रकरणे गैर-उपनगरीय आहेत.
दंड म्हणून वसूल केलेल्या एकूण 16.13 कोटी रुपयांपैकी, 6.64 कोटी रुपये उपनगरीय प्रकरणांमधून, तर 9.49 कोटी रुपये गैर-उपनगरीय प्रकरणांमधून वसूल करण्यात आले आहेत. यामध्ये वातानुकूलित लोकलमधील 12,698 प्रकरणांचा आणि अनधिकृत वातानुकूलित लोकल प्रवाशांकडून दंड म्हणून वसूल केलेल्या 39.66 लाख रुपयांचा समावेश आहे. पुणे विभागात, आढळलेल्या एकूण 51,791 प्रकरणांपैकी 9,611 उपनगरीय तर 42,180 गैर-उपनगरीय प्रकरणे आहेत. दंड म्हणून वसूल केलेल्या एकूण 4.54 कोटी रुपयांपैकी, 0.52 कोटी रुपये उपनगरीय प्रकरणांमधून तर 4.02 कोटी रुपये गैर-उपनगरीय प्रकरणांमधून वसूल करण्यात आले आहेत.
प्रवाशांचा सन्मानजनक प्रवास
गैरसोय आणि दंड टाळण्यासाठी प्रवाशांनी योग्य आणि वैध तिकीट खरेदी करून सन्मानाने आणि जबाबदारीने प्रवास करावा, असे आवाहन मध्य रेल्वे करत आहे. विनातिकीट प्रवासाबाबत रेल्वे आपल्या शून्य-सहिष्णुता धोरणाचा पुनरुच्चार करत आहे आणि प्रवाशांना आरामदायक व सन्मानजनक प्रवास मिळावा यासाठी रेल्वे कटिबद्ध आहे असे सांगण्यात आले.
