रायगड : पुढारी वृत्तसेवा : रायगड जिल्हा परिषदेच्या माध्यमातून रविवारी (दि.१) वरसोली समुद्रकिनारी राबविण्यात आलेल्या स्वच्छता मोहिमेत अफगाण प्रोडक्ट असे नाव असलेली १० पाकिटे मुख्य कार्यकारी अधिकारी डॉ. भरत बास्टेवाड यांना आढळून आली. यानंतर त्यांनी याची माहिती पोलीस अधीक्षक सोमनाथ घार्गे यांना दिली. पोलीस अधीक्षकांनी घटनास्थळी येऊन पाहणी केल्यानंतर ही चरसची पाकिटे असल्याचे स्पष्ट केले. (Raigad News)
वरसोली समुद्रकिनारी आज सकाळी ७.३० वाजण्याच्या सुमारास स्वच्छता मोहीम सुरू होती. यावेळी समुद्रकिनारी असणाऱ्या कचऱ्यात एका छोटी गोणी मुख्य कार्यकारी अधिकारी डॉ. भरत बास्टेवाड यांच्या नजरेस पडली. ही गोणी त्यांनी कचऱ्यातून बाहेर काढली असता त्यामध्ये अफगाण प्रोडक्ट असे नाव असलेली १० पाकिटे दिसून आली. मागील काही दिवसांत रायगड जिल्ह्यातील विविध समुद्रकिनारी अशी पाकिटे सापडली होती. त्यामध्ये चरस हा अंमली पदार्थ असल्याचे तपासात निष्पन्न झाले होते. (Raigad News)
पोलीस अधीक्षक सोमनाथ घार्गे यांनी घटनास्थळी धाव घेत सदर पाकिटे चरसची असल्याचे स्पष्ट केले. तातडीने पंचनामा करून परिसरात शोध मोहीम राबविण्याचे आदेश दिले आहेत. तसेच अशाच प्रकारच्या पिशव्या गेल्या महिन्यात रायगड किनाऱ्यावर सापडल्या होत्या. तब्बल साडेआठ कोटींचा चरस जप्त करण्यात आला आहे, अशी माहिती उपस्थितांना दिली. त्यानंतर अलिबाग पोलिसांनी पंचनामा करीत सदर पाकिटे जप्त केली आहेत.
हेही वाचा
