महाड, पुढारी वृत्तसेवा : नुकतीच काही महिन्यांपूर्वी विनयभंग प्रकरणी तुरुंगाची हवा खाऊन आलेल्या एका विकृत मानसिकतेच्या तरुणाने पुन्हा एकदा दोन शाळकरी अल्पवयीन मुलींसोबत अश्लील चाळे केल्याची धक्कादायक घटना महाड शहरामध्ये घडली आहे. (Raigad Crime News)
याबाबत पोलीस सूत्रांकडून मिळालेल्या सविस्तर माहितीनुसार दि. 14 एप्रिलरोजी दुपारी 12.15 च्या सुमारास महाड शहरातील एका सोसायटीच्या पार्किंग मधील कार्यालयात या दोन अल्पवयीन मुली आपली शिकवणी संपवून काही कामानिमित्त कार्यालयात गेल्या होत्या. यावेळी आरोपीने कार्यालयात घुसून या दोन्ही अल्पवयीन मुलींसोबत अश्लील चाळे करून त्यांच्या मनात लज्जा उत्पन्न होईल असे वर्तन केले.
या घटनेबाबत मुलींच्या नातेवाईकांनी दिलेल्या तक्रारीनुसार पोलिसांनी ओंकार रजनीकांत रणदिवे (वय 27, रा. महाड शहर) याच्याविरोधात पोस्को अंतर्गत गुन्हा दाखल केला आहे. अधिक तपास महाड शहर पोलीस ठाण्याचे पोलीस निरीक्षक संतोष जाधव यांच्या मार्गदर्शनाखाली सुरू आहे. या घटनेने महाड शहरात एकच खळबळ उडाली आहे.
