कार्ला : मागील अनेक वर्षांपासून रेशनकार्डपासून वंचित असणार्या वाकसई येथील 26 कातकरी कुटुंबीयांना रेशनकार्ड उपलब्ध झाल्याने त्यांच्या चेहर्यावर आनंद झळकत होता. राष्ट्रवादीच्या गावभेट दौर्यानिमित्त आ. सुनिल शेळके मे महिन्यामध्ये वाकसई येथे आले होते. त्यावेळी काही कातकरी महिलांनी नवीन रेशनकार्ड मिळत नसल्याची तक्रार त्यांच्याकडे केली होती.
याची दखल घेऊन आमदार शेळके यांनी तात्काळ संबंधित अधिकार्यांना प्रश्न मार्गी लावण्याचे आदेश दिले होते. त्या पार्श्वभूमीवर मंगळवार (दि.10 मे) रोजी वाकसई येथे कॅम्प आयोजित करण्यात आला होता. त्यामध्ये अन्न पुरवठा विभागाचे अधिकारी व आमदार शेळके यांचे सहकारी यांनी कातकरी कुटुंबियांच्या कागदपत्रांची पूर्तता करून रेशनकार्डाचे अर्ज भरून घेतले होते. त्यातील पात्र 26 कुटुंबांना रेशनकार्डचे शुक्रवारी (दि.10 ) वाटप करण्यात आले.
आदिवासी विकास विभागाकडून राबविल्या जाणार्या योजनांच्या आवश्यक कागदपत्रांमध्ये शिधापत्रिका महत्त्वपूर्ण आहे. त्यामुळे शिधापत्रिका नसणार्या गरजू कातकरी बांधवांना विविध योजनांचा लाभ मिळत नव्हता. अनेकदा केवळ रेशनकार्डअभावी कातकरी बांधव शासकीय योजनेचे लाभ घेण्यापासून वंचित राहत होते. त्यांना विविध शासकीय योजनांचे लाभ मिळवून देण्यासाठी व समाजाच्या मुख्य प्रवाहात आणण्यासाठी नायब तहसीलदार प्रसन्न केदारी, अन्नपुरवठा विभागाचे शिवाजी जाधव यांनी मोलाचे सहकार्य केले.
यावेळी खरेदी विक्री संघाचे माजी चेअरमन बाळासाहेब भानुसघरे, सरपंच दिपक काशीकर, अमोल केदारी, हरिष जाणिरे, मा.ग्रा.पं.सदस्य महेश पारधी, दक्षता समिती सदस्य सुजित सातकर, अशोक ढाकोळ, रोहिदास बालगुडे व कातकरी बांधव उपस्थित होते. सामाजिक कार्यकर्ते अमोल केदारी – आमदार सुनिल शेळके यांच्या सकारात्मक दृष्टिकोनामुळेच हे शक्य झाले.फक्त आश्वासन न देता प्रत्यक्षात कार्यवाही करत एका महिन्याच्या आत नवीन रेशनिंग कार्ड मिळवुन दिल्याने अमोल केदारी यांनी आमदारांचे आभार व्यक्त केले.
