पुणे : मंकीपॉक्सचा विषाणू वेगळा करण्यात शास्त्रज्ञांना यश

पुणे : कोरोनाची लाट ओसरत असतानाच देशात मंकीपॉक्सचे रुग्ण वाढत असल्याने चिंतेत भर पडली आहे. मंकीपॉक्सचा एक रुग्ण सापडणे हाही साथीचा उद्रेक असल्याचे जागतिक आरोग्य संघटनेने जाहीर केले आहे. मंकीपॉक्सवर उपचार शोधता यावे, यासाठी राष्ट्रीय विषाणू संस्थेमध्ये (एनआयए) शास्त्रज्ञांची टीम अथक प्रयत्न करत होती. अखेर शास्त्रज्ञांच्या टीमला रुग्णांच्या नमुन्यातील मंकीपॉक्सचा विषाणू वेगळे करण्यात यश आले आहे. त्यामुळे जिवंत विषाणूच्या सहाय्याने टेस्टिंग किट शोधणे आणि लसीवर काम करणे शक्य होणार आहे. भारतीय वैद्यकीय संशोधन परिषदेने मंकीपॉक्सची तपासणी चाचणी किट आणि लस तयार करण्यासाठी टेंडर जाहीर केले. सध्या कोणतीही किट किंवा लस उपलब्ध नाही.

मात्र, खाजगी कंपनीच्या मदतीने मंकीपॉक्सविरोधी लस तयार करण्याबाबत हे यशस्वी पॉल मानले जात आहे. पुण्यातील बीएसएल-3 स्तरावरील प्रयोगशाळेत हे काम सुरू आहे. यातील प्रत्येक विषाणू वेगळ्या अभ्यासासाठी सुपूर्द केला जाईल, असे एनआयव्हीतर्फे जाहीर करण्यात आले आहे. कोरोनाच्या अनपेक्षितपणे उदभवलेल्या महामारीमुळे संपूर्ण जगासमोर संकट उभे राहिले होते. कोरोनाचे निदान करता यावे आणि त्यासाठी कोरोनाचा जिवंत विषाणू वेगळा करता यावा यासाठी जगभरातील शास्त्रज्ञ अथकपणे झटत होते. त्या काळातही एनआयव्हीमध्ये ही प्रक्रिया यशस्वीरित्या पार पडली. आता मंकीपॉक्सच्या संशोधनामध्येही यश मिळेल अशी आशा शास्त्रज्ञांकडून व्यक्त करण्यात आली आहे.