पुणे : पुढारी वृत्तसेवा: भारतीय जनता पक्षाचे सोलापूरचे माजी जिल्हाध्यक्ष श्रीकांत देशमुख यांच्याविरोधात बलात्काराचा गुन्हा दाखल झाला असून, हा गुन्हा पुढील तपासासाठी सोलापूर येथील सदर बाजार पोलिसांकडे वर्ग केला आहे. पीडित महिलेने भीती वाटत असल्याच्या कारणातून पुण्यातील डेक्कन पोलिस ठाण्यात धाव घेत तक्रार दिली होती. त्यानुसार हा गुन्हा आता वर्ग करण्यात आला आहे, अशी माहिती डेक्कन पोलिसांनी दिली आहे. एका महिलेने आरोप केल्यानंतर देशमुख यांनी भाजपच्या जिल्हाध्यक्षपदाचा राजीनामा दिला होता. फिर्यादी पीडित महिला पुण्यातील आहे.
महिलेशी ओळख झाल्यानंतर देशमुख यांनी तीन वर्षांपासून पत्नीशी मतभेद असल्याचे फिर्यादी महिलेला सांगितले होते. तसेच, पत्नीला लवकरच घटस्फोट देणार असल्याची बतावणी केली होती. त्यानंतर देशमुख यांनी बलात्कार केल्याचे पीडित महिलेने दिलेल्या फिर्यादित म्हटले आहे. याबाबत एक व्हिडिओ देखील समाजमाध्यमावर व्हायरल झाला होता. देशमुख यांनी महिलेला विवाहाचे आमिष दाखवून बलात्कार केला. या प्रकाराची कोणाला माहिती दिल्यास महिला व तिच्या आईला जिवे मारण्याची धमकी दिल्याचे फिर्यादींनी त्यांच्या जबाबात म्हटले आहे.
श्रीकांत देशमुख यांच्यावर बलात्कार, अनैसर्गिक अत्याचार, धमकावल्याप्रकरणी पुण्यातील डेक्कन पोलिस ठाण्यातून आमच्याकडे गुन्हा वर्ग केला आहे. तो दाखलही करण्यात आला आहे.
– अश्विनी भोसले, पोलिस निरीक्षक, सदर बझार पोलिस ठाणे (सोलापूर)
