प्रसाद जगताप
पुणे : एखाद्या वाहनातून शालेय वाहतूक करायची असेल, तर त्या वाहनाला मोटार वाहन कायद्यानुसार विविध नियम लागू होतात. मात्र, पीएमपीकडून शालेय वाहतूक करताना नियमांना केराची टोपली दाखविण्यात येत आहे. त्यामुळे शासकीय वाहन असलेल्या पीएमपीला आरटीओचे नियम लागू नाहीत का, असा सवाल पुणेकर वाहनचालकांकडून उपस्थित केला जात आहे. पीएमपीच्या तब्बल 56 बसमार्फत शहरातील 36 शाळांमध्ये शालेय वाहतूक सेवा पुरविली जात आहे. रास्त दरात ही वाहतूक पुरविली जात असल्यामुळे सामान्य वर्गातील लोक या सेवेचा फायदा घेतात.
मात्र, पीएमपीकडून या सेवेसाठी आवश्यक असलेल्या मोटारवाहन कायद्यातील कोणत्याही नियमांचे पालन करण्यात येत नसल्याचे पाहणीदरम्यान समोर आले आहे. त्यामुळे पीएमपी विद्यार्थ्यांच्या जीवाशी खेळत असल्याचा आरोप करण्यात येत आहे. पीएमपीने शालेय वाहतुकीसाठी प्रथमत: शालेय वाहतुकीचा स्वतंत्र परवाना घेणे आवश्यक आहे. हा परवाना पीएमपी प्रशासनाने आरटीओकडून घेतलेला नाही. त्यासोबतच शालेय वाहतुकीच्या गाड्यांची आरटीओ कार्यालयामध्ये नोंद असणे आवश्यक आहे, ती नोंद सुध्दा आरटीओत नाही. यासोबतच महाराष्ट्र स्कूल बस अधिनियमन कायदा 2011 च्या कोणत्याही नियमांचे पीएमपीकडून पालन करण्यात येत नसल्याचे दिसून आले आहे.
1) वाहनात महिला सहाय्यक हवी
2) वाहनाचा रंग पिवळा हवा
3) शालेय विद्यार्थी वाहतूक परवाना आवश्यक, आरटीओत नोंद हवी
4) बस 20 वर्षांपेक्षा जुन्या असू नयेत, अंतर्गत आसन व्यवस्था चांगली असावी, आसनाच्या बाजूला हँडल असावेत
5) अग्निशामक उपकरण बसविणे आवश्यक
6) बसमध्ये उभे राहिल्यास धरण्यासाठी हँडल
7) खिडकीच्या बाहेरील बाजूस आडवे लोखंडी बार
8) आपत्कालीन दरवाजा
9) धोक्याचा इशारा देणारी प्रकाश योजना व घंटी
10) शालेय प्रयोजनासाठी वापरण्यात येत असल्यामुळे गाडीवर विद्यार्थ्यांचे चित्र
11) गाडीमध्ये बॅग ठेवण्यासाठी जागा
12) आसनाच्या मागच्या बाजूस हँडल आवश्यक
13) प्रथमोपचार पेटी
14) बसमध्ये चढण्यासाठी खालची पायरी
15) फिटनेस तपासणी वेळेवर करावी
16) शालेय वाहतुकीचा परवाना असावा
17) इन्शुरन्स असावा
18) आसनक्षमतेपेक्षा जास्त विद्यार्थी बसवू नयेत.
19) खासगी वाहनांमधून शालेय वाहतूक करू नये
आरटीओकडून शालेय वाहतचकीच्या नियमांची माहिती तत्काळ घेऊन, त्याप्रमाणे लगेचच बदल करण्यात येतील. परवान्यासह बसच्या रचनेमध्ये आवश्यक ते बदल करून तातडीने नियमानुसार शालेय वाहतूक सेवा पुरविण्यात येईल.
– लक्ष्मीनारायण मिश्रा, अध्यक्ष व व्यवस्थापकीय संचालक, पीएमपीएमएल
