पिंपरी : दुचाकीस्वार तरुणाला मारहाण

पिंपरी : दुचाकीवरून जात असलेल्या तरुणाला तिघांनी मिळून लुटले. ही घटना गुरुवारी (दि. 30) मध्यरात्री साडेबाराच्या सुमारास खडी मशिन चौक, एमआयडीसी भोसरी येथे घडली. याप्रकरणी दाऊद जैलुद्दिन शेख (28, रा. आदर्शनगर, मोशी) यांनी एमआयडीसी भोसरी पोलिस ठाण्यात फिर्याद दिली आहे.

त्यानुसार, तीन अनोळखी व्यक्तींच्या विरोधात गुन्हा दाखल करण्यात आला आहे. फिर्यादी शेख हे आरटीओ एजंट आहेत. दरम्यान, गुरुवारी मध्यरात्री ते दुचाकीवरून घरी जात होते. त्यावेळी खडी मशिन चौकात आरोपींनी शेख यांना अडवून हाताने मारहाण केली. तसेच, त्यांच्या खिशातून नऊ हजारांचा मोबाईल जबरदस्तीने काढून घेतला. त्यानंतर फिर्यादीकडील कागदपत्रे असलेली बॅग चोरट्यांनी जबरदस्तीने चोरून नेली.