पिंपरी : शहरातील प्रमुख दहा गणेश विसर्जन घाटांवर वैद्यकीय पथकांसह सुसज्ज रुग्णवाहिका तैनात ठेवण्यात आली आहे. तसेच या घाटांसह इतर घाटांवर जीवरक्षक, अग्निशामक दल, आपत्ती व्यवस्थापन आणि सुरक्षा पथक नेमण्यात आले आहे, अशी माहिती आयुक्त शेखर सिंह यांनी दिली. नागरिकांनी पर्यावरणपूरक गणेश विसर्जनाला प्राधान्य द्यावे, असे आवाहनदेखील त्यांनी केले आहे.
शहरात यंदाचा गणेशोत्सव आनंदात आणि मोठ्या उत्साहात साजरा करण्यात येत आहे. त्यासाठी महापालिकेच्या वतीने विविध सुविधा पुरवण्यात येत आहे.
प्रमुख विसर्जन घाट
निगडी-प्राधिकरणातील गणेश तलाव, वाल्हेकरवाडीमधील जाधव घाट, काळेवाडीमधील स्मशान घाट, पिंपळे गुरव घाट, वाकड गावठाण घाट, मोशी नदी घाट, चिखली स्मशान घाट, थेरगाव पूल नदी घाट, सुभाषनगर पिंपरी घाट आणि सांगवी येथील वेताळबाबा मंदिर घाट याठिकाणी वैद्यकीय साहित्य, औषधे आणि सुसज्ज रुग्णवाहिकेसह वैद्यकीय पथक तैनात ठेवले जाणार आहे. या वैद्यकीय पथकामध्ये वैद्यकीय अधिकारी, स्टाफ नर्स, ब—दर, वॉर्ड बॉय, रुग्णवाहिका वाहनचालक, सफाई कामगार आदींचा समावेश आहे.
वैद्यकीय पथक कार्यरत राहणार
गणेश विसर्जनाच्या दिवशी म्हणजेच 4 ते 9 सप्टेंबर या कालावधीत विसर्जन घाटांवर वैद्यकीय पथक कार्यरत राहतील, अशी माहिती सहायक आरोग्य वैद्यकीय अधिकारी डॉ. लक्ष्मण गोफणे यांनी दिली. गणेश विसर्जन घाटांवर विसर्जन हौद उभारले आहे. स्वयंसेवी संस्थांमार्फत मूर्ती संकलनदेखील केले जात आहे. पर्यावरणपूरक गणेशोत्सवासाठी महापालिकेकडून केलेल्या आवाहनाला नागरिकांचा प्रतिसाद मिळत आहे.
26 विसर्जन घाटांवर अग्निशामक दल
अग्निशामक विभागाच्या वतीने शहरातील 26 विसर्जन घाटांवर लाईफ जॅकेट, रिंग, गळ, बोट, मेगा फोन, दोरी अशा बचाव कार्यासाठी लागणार्या साहित्यासह पथक तैनात केले आहे. क्षेत्रीय कार्यालयांमार्फतदेखील व्यवस्था करण्यात आली आहे, असे महापालिका प्रशासनाच्या वतीने सांगण्यात आले.
