पिंपरी : पुढारी वृत्तसेवा : उगवता सूर्य पाहायचा असेल, तर दहा लाख रुपये रेडी ठेव, अशी धमकी देत एकाने एमआयडीसीतील सहायक अभियंत्याला खंडणी मागितली. ही घटना गुरुवारी (दि. 21) रात्री एमआयडीसी ऑफिस, चिंचवड येथे घडली. संतोष दत्तात्रय सुवर्णकार (वय 46, रा. एमआयडीसी चिंचवड) यांनी याप्रकरणी पिंपरी पोलिस ठाण्यात फिर्याद दिली आहे.
त्यानुसार अनोळखी मोबाईलधारकावर गुन्हा दाखल करण्यात आला आहे. पोलिसांनी दिलेल्या माहितीनुसार, फिर्यादी हे चिंचवड येथील एमआयडीसी कार्यालयात सहायक अभियंता म्हणून कार्यरत आहेत. दरम्यान, गुरुवारी रात्री ते ऑफिसमध्ये काम करीत असताना आरोपीने त्यांच्या मोबाईलवर फोन केला. 'उगवता सूर्य पाहायचा असेल ना, तर दहा लाख रुपये कॅश उद्या रेडी ठेव. नाहीतर तुझ्या आयुष्याला कायमचा फुलस्टॉप लावून टाकतो,' अशी धमकी दिली. पिंपरी पोलिस तपास करीत आहेत.
