पिंपरी : पुढारी वृत्तसेवा: कंपनीत पैसे गुंतवल्यास दामदुप्पट व सोन्याच्या गुंतवणुकीतून चांगला परतावा मिळवून देण्याच्या आमिषाने पाच जणांनी एकाची फसवणूक केली. हा प्रकार 9 मे 2019 ते 17 जुलै 2022 या कालावधीत शास्त्री चौक भोसरी आणि कनक ज्वेलर्स, अंधेरी, मुंबई येथे घडला. अशोक कैलास करडुले (31, रा. आळंदी देवाची) यांनी भोसरी पोलिस ठाण्यात फिर्याद दिली आहे. त्यानुसार, मुनिंद्र मिलिंद तुळवे (रा. वडाळा मुंबई), एक महिला, संदीप मोहिते (रा. फलटण), सनी इंगळे (रा. वाकड), पारस जैन (रा. मुंबई) यांच्या विरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, आरोपी मुनिंद्र आणि महिलेने त्यांच्या रिच हेल्प क्लब कंपनीत पैसे गुंतवल्यास दाम दुप्पट पैसे देतो, असे फिर्यादी करडुले यांना सांगितले. आरोपी संदीप, सनी आणि पारस यांनी सोन्यामध्ये पैसे गुंतवल्यास चांगला परतावा मिळतो, असे आश्वासन फिर्यादी यांना दिले. त्यावर विश्वास ठेऊन फिर्यादी यांनी आरोपींना चेक, आरटीजीएस आणि गुगल पेद्वारे रिच हेल्प क्लबमध्ये गुंतवणूक करण्यासाठी 41 लाख आणि सोने खरेदीमध्ये गुंतविण्यासाठी 17 लाख रुपये दिले. अशा प्रकारे एकूण 58 लाख रुपये घेऊन आरोपींनी फिर्यादी यांची फसवणूक केली, असे फिर्यादीत नमूद आहे. भोसरी पोलिस तपास करीत आहेत.
