पिंपरी : आता आरटीईची चौथी फेरी सुरू विद्यार्थ्यांना प्रवेशासाठी 27 तारखेपर्यंत मुदत

पिंपरी : पुढारी वृत्तसेवा : शिक्षण हक्क कायद्यानुसार (आरटीई) गरीब विद्यार्थ्यांसाठी खासगी शाळांमध्ये राखीव 25 टक्के प्रवेश प्रक्रियेंतर्गत आता प्रतीक्षा यादीतील विद्यार्थ्यांना आणखी एक संधी देण्यात आली आहे. त्यासाठी चौथी फेरी सुरू करण्यात आलेली आहे. ही फेरी 27 तारखेपर्यंत चालणार आहे. त्यामुळे प्रतीक्षा यादीतील ज्या विद्यार्थ्यांचे प्रवेश अद्याप बाकी आहेत. त्यांना त्यांचे प्रवेश निश्चित करुन घेता येणार आहे.

शहरामध्ये शिक्षण हक्क कायद्यानुसार (आरटीई) खासगी शाळांमध्ये गरीब विद्यार्थ्यांसाठी 25 टक्के राखीव जागांवरील प्रवेश प्रक्रियेत 2 हजार 677 विद्यार्थ्यांचे प्रवेश निश्चित झाले आहेत. तर, 578 जागा रिक्त राहिल्या आहेत. या रिक्त जागा भरण्यासाठी आता प्रतीक्षा यादीतील विद्यार्थ्यांसाठी 22 तारखेपासून चौथी फेरी सुरू करण्यात आली आहे.

शहरातील शाळांमध्ये 25 टक्के प्रवेश प्रक्रिया ऑनलाइन पद्धतीने राबविण्यात आली. निवड यादीतील सोडत काढल्यानंतर 6 एप्रिलपासून विद्यार्थ्यांच्या प्रवेश प्रक्रियेला सुरुवात झाली. त्यासाठी प्रथम 20 एप्रिलपर्यंत मुदत होती. त्यानंतर ही मुदत 30 एप्रिलपर्यंत वाढविण्यात आली. दिलेल्या मुदतीत विद्यार्थ्यांचे प्रवेश पूर्ण न झाल्याने 10 मेपर्यंत मुदतवाढ देण्यात आली. 'आरटीई'अंतर्गत 25 टक्के प्रवेशासाठी 174 खासगी शाळांमध्ये गरीब विद्यार्थ्यांसाठी एकूण 3 हजार 255 जागा रिक्त होत्या. त्यापैकी निवड यादीतील 2 हजार 23 विद्यार्थ्यांचे प्रवेश निश्चित झाले. तर, प्रतीक्षा यादीत तिसर्‍या फेरीपर्यंत 654 विद्यार्थ्यांचे प्रवेश निश्चित झाले.