पिंपरी : पुढारी वृत्तसेवा : पिंपरी चिंचवड महानगरपालिकेतर्फे नव स्टार्टअपना संधी देण्यासाठी आवाहन करण्यात आले होते. या आवाहनाला देशभरातून 78 स्टार्टअपनी प्रतिसाद देत नोंदणी करून सहभाग घेतला. यामधून शहरासाठी आवश्यक असलेल्या 23 स्टार्टअपला आपल्या कल्पना मांडण्याची संधी देण्यात आली. नागरी उपाय/ उत्पादने अंमलात आणून समस्यांवर सहज तोडगा काढण्यासाठी स्टार्टअप इंडियाच्या धर्तीवर पिंपरी चिंचवड महानगरपालिका व स्मार्ट सिटीच्या वतीने स्टार्टअप्सला संधी म्हणून 'पीसीएमसी सिव्हिक इनोव्हेशन कॉन्क्लेव्ह-2022' या उपक्रमाचे आयोजन करण्यात आले होते.
त्यामध्ये, 23 स्टार्टअपनी सहभाग घेऊन आयुक्त तथा प्रशासक राजेश पाटील यांच्यासमोर नवकल्पनांचे सादरीकरण केले. चिंचवड येथील ऑटो क्लस्टर येथे हा उपक्रम पार पडला. सांडपाण्याचा निचरा, घनकचरा व्यवस्थापन, आरोग्य व वैद्यकीय, पर्यावरण व स्वच्छता, रस्ते, बांधकाम क्षेत्र, आयओटी विभाग, पार्किंग संबंधित असलेल्या स्टार्टअपनी समस्यांवरील उपाय मांडले. त्यातून शहरासाठी उपयुक्त अशा स्टार्टअपला प्रायोगिक तत्वावर संधी देण्यात येणार आहे.
या प्रसंगी आयुक्त राजेश पाटील यांच्यासह पॅनेलिस्ट म्हणून अतिरिक्त आयुक्त विकास ढाकणे, शहर अभियंता मकरंद निकम, स्मार्ट सिटीचे सह-मुख्य कार्यकारी अधिकारी किरणराज यादव, मुख्य माहिती व तंत्रज्ञान अधिकारी निळकंठ पोमण, उपायुक्त अजय चारठणकर, कंपनी सेक्रेटरी चित्रा पवार, महापालिका अधिकारी, स्मार्ट सारथी टीमचे प्रतिनिधी उपस्थित होते. आयुक्त पाटील म्हणाले, समाज व शहरी जीवनास फायदेशीर अशा नवकल्पनांचा वापर वाढवून समाज जीवन सुकर करण्यासाठी तसेच महापालिकेद्वारे विकास प्रकल्पांची गती वाढविण्यासाठी त्यांना नवस्टार्टअपची जोड देऊन प्रोत्साहीत करण्यात येणार आहे.
स्टार्टअप्सना नवकल्पना आणि डिझाईनद्वारे विकसित होण्यासाठी स्टार्टअप इंडियाच्या धर्तीवर शहरी समस्यांचे निवारण करणा-या स्टार्टअपला प्रोत्साहन मिळावे, यासाठी पिंपरी चिंचवड महापालिकेने पुढाकार घेतला आहे. डिजिटल/तंत्रज्ञान क्षेत्रापासून ते सामाजिक क्षेत्र, आरोग्यसेवा, शिक्षण आदी क्षेत्रातील नवकल्पना आणि स्टार्टअप्सची इकोसिस्टम तयार करणे आणि नोकरी शोधणार्याऐवजी नोकरी निर्मात्यांच्या देशात भारत परिवर्तित होण्याच्या उद्देशाने महापालिकेच्या माध्यमातून 'पीसीएमसी सिव्हिक इनोव्हेशन कॉन्क्लेव्ह 2022' उपक्रम घेण्यात आला.
