पुणे: पूर्ववैमनस्यातून टोळक्याने एका तरुणावर धारधार शस्त्राने वार केले. गंभीर जखमी झाल्याने तरुणाला खासगी रुग्णालयात उपचारासाठी दाखल केले होते. मात्र, बुधवारी (दि.30) दुपारी त्याचा उपचारादरम्यान मृत्यू झाला. अभिजित उमेश अवचरे (वय 19, रा. पिसोळी) असे खून झालेल्या तरुणाचे नाव आहे. मंगळवारी (दि.29) रात्री साडेदहा वाजण्याच्या सुमारास आंबेगाव पठार कात्रज येथील मस्केचाळ जैन मंदिराजळ हा प्रकार घडला आहे.
याप्रकरणी ओंकार राजेंद्र दानवले (वय 19, रा. ओव्हाळ वाडा, कात्रज गाव) याने आंबेगाव पोलिस ठाण्यात फिर्याद दिली आहे. त्यानुसार पोलिसांनी खुनाचा गुन्हा दाखल करून पृथ्वीराज पवार (वय 20), संकेत विठ्ठल रेणुसे (वय 20) आणि नवीन नरसप्पा गाडधरी (वय 20) या तिघांना अटक केली आहे. तर त्यांच्या सात अल्पवयीन साथीदारांना ताब्यात घेतले आहे. (Latest Pune News)
पोलिसांच्या माहितीनुसार, खून झालेला तरुण अभिजित अवचरे, ओंकार दानवले आणि त्यांचे मित्र येथील मस्के चाळ परिसरात थांबलेले होते. अभिजित, ओंकार याचे आरोपीसोबत पूर्वीचे वाद होते. दरम्यान, मंगळवारी (दि. 29 जुलै) रात्री साडेअकराच्या सुमारास दानवले आणि अभिजित दुचाकीवरून कात्रजमधील जैन मंदिराजवळून निघाले होते. त्या वेळी आरोपी गाडधरी, रेणुसे, पवार यांच्यासह साथीदारांनी त्यांना अडवले.
त्यांना शिवीगाळ केली. नंतर टोळक्याने या दोघांना मारहाण केली. तसेच अभिजित याच्या डोक्यात तीक्ष्ण शस्त्राने सपासप वार केले. या घटनेत अभिजित गंभीर जखमी झाला. टोळक्याच्या या हल्ल्याने परिसरात तणावाचे वातावरण निर्माण झाले होते. हल्ल्यानंतर टोळके पसार झाले.
घटनेची माहिती मिळताच पोलिसांनी घटनास्थळी धाव घेतली. अभिजित याला उपचारासाठी खासगी रुग्णालयात दाखल केले होते. परंतु, उपचार सुरू असतानाचा बुधवारी दुपारी त्याचा मृत्यू झाल्याचे डॉक्टरांनी सांगितले. पोलिसांनी याप्रकरणी प्रथम खुनाच्या प्रयत्नाचा गुन्हा नोंदवला होता. त्यात खुनाचे कलम वाढविले जाणार असून, आरोपींना ताब्यात घेतल्याची माहिती वरिष्ठ पोलिस निरीक्षक शरद झिने यांनी दिली. पुढील तपास सहाय्यक पोलिस निरीक्षक स्वाती देवधर करत आहेत.
पूर्वीच्या वादातून हा प्रकार घडला आहे. टोळक्याने धारधार शस्त्राने एका तरुणाच्या डोक्यात वार केले होते. उपचारादरम्यान त्या तरुणाचा मृत्यू झाला आहे. याबाबत पोलिसांनी खुनाच्या प्रयत्नाच्या गुन्ह्यात खुनाचे कलमवाढ केली असून, तीन आरोपींना अटक केली आहे. तर त्यांच्या अल्पवयीन साथीदारांला ताब्यात घेतले आहे.
- शरद झिने, वरिष्ठ पोलिस निरीक्षक, आंबेगाव पोलिस ठाणे
