पुणे: येरवड्यातील पं. जवाहरलाल नेहरू उद्योग केंद्रातून पसार झालेल्या अल्पवयीनासह तिघांना बिबवेवाडी पोलिसांनी ताब्यात घेतले. मार्केट यार्ड-गंगाधाम रस्त्यावर ही कारवाई करण्यात आली, तर याप्रकरणी पृथ्वी दीपक श्रीवास्तव (वय १८, रा. श्रीनगर, जि. गोंदिया), प्रेम एकनाथ जाधव (वय १८, रा. छत्रपती संभाजीनगर) यांना अटक करण्यात आली.
गेल्या १३ ऑगस्ट रोजी बालसुधारगृहातून रात्री अल्पवयीन पसार झाला होता. याप्रकरणी येरवडा पोलीस ठाण्यात गुन्हा दाखल झाला होता. या प्रकरणाचा पोलिसांकडून तपास सुरू होता. अल्पवयीन व त्याला फूस लावणारे दोघे मार्केटयार्ड-गंगाधाम रस्त्यावर एका चहा विक्री करणाऱ्या दुकानाजवळ थांबल्याची माहिती बिबवेवाडी पोलिसांना मिळाली.
त्यानंतर पोलिसांनी सापळा लावून तिघांना ताब्यात घेतले. पोलिस उपायुक्त मिलिंद माेहिते, सहायक आयुक्त राहुल आवारे यांच्या मार्गदर्शनाखाली वरिष्ठ पोलिस निरीक्षक अश्विनी सातपुते, गुन्हे शाखेचे निरीक्षक सूरज बेंद्रे, उपनिरीक्षक मालोजी कांबळे, पोलिस संजय गायकवाड आदींच्या पथकाने ही कारवाई केली.
