Pune News : स्वमान्यतेचे अडीचशे प्रस्ताव फेटाळले

पुणे : पुढारी वृत्तसेवा :  जिल्हा परिषदेच्या शिक्षण विभागाकडे स्वमान्यतेसाठी 320 शाळांनी अर्ज दाखल केले आहेत. जुलैपासून शाळांसाठी स्वमान्यता प्रक्रिया ऑनलाइन केली असून, क्यूआर कोड असलेले प्रमाणपत्र देण्यास सुरुवात झाली. जुलैपासून आतापर्यंत केवळ अकरा शाळांना ऑनलाइन पद्धतीने स्वमान्यता प्रमाणपत्र मिळाले, तर 238 शाळांचे प्रस्ताव जिल्हा परिषदेने  फेटाळले आहेत.

शाळांना सर्व कागदपत्रे ऑनलाइन अपलोड करावी लागतात, त्यासाठी 320 शाळांनी अर्ज दाखल केले होते, त्यापैकी 238 शाळांचे प्रस्ताव जिल्हा परिषदेने फेटाळले आहेत.

तर 62 शाळांना स्वमान्यता देण्याच्या प्रक्रियेसाठी शाळा तपासणीचे आदेश दिले आहेत. मोठ्या प्रमाणात त्रुटी राहत असल्याने शाळांची कागदपत्रांची पूर्तता करण्यास सांगण्यात आले आहे. त्रुटीमध्ये मोबाईलवरून फोटो काढून अपलोड केल्याने ते व्यवस्थित दिसत नसल्याचे प्रमाण जास्त आहे. दरम्यान, पुण्यात काही शाळा बोगस प्रमाणपत्राच्या आधारे सुरू असल्याची बाब समोर आली होती. त्यामुळे स्वमान्यता या ऑनलाइन प्रणालीद्वारेच देण्याचा निर्णय झाला. तसेच क्यूआर कोडमुळे बनावट प्रमाणपत्र तयार होणार नसल्याचा दावा जिल्हा परिषदेने केला आहे. खासगी शाळांना दर तीन वर्षांनी स्वमान्यता देण्यात येते. त्यासाठी आता जिल्हा परिषदेने ई मान्यता प्रणाली विकसित केली आहे.

पुण्यातील 2 हजार 800 हून अधिक शाळा ई मान्यता मिळण्यास पात्र आहेत. त्या सर्व शाळांना क्यूआर कोड असलेले प्रमाणपत्र देण्यात येणार आहे. अर्ज करण्यासाठी दोन हजार रुपये शुल्क आकारण्यात येत आहे. परिणामी, जिल्हा परिषदेचे उत्पन्न वाढत आहे. पुणे शहर, पिंपरी-चिंचवड आणि ग्रामीण भागांतील सर्व खासगी अनुदानित आणि विनाअनुदानित शाळांना दर तीन वर्षांनी स्वमान्यता प्रमाणपत्र देण्याचे काम जिल्हा परिषदेकडून देण्यात येते.