केडगाव: रविवारी मध्यरात्रीच्य सुमारास केडगाव(ता.दौंड) मधील मोरे वस्ती येथे 5 ते 6 जणांच्या टोळक्याने चोरी करण्याच्या उद्देशाने एका शेतकऱ्यांच्या डोक्यात कोयत्याने वार केले आहेत. यात मोरे वस्ती मधील 60 वर्षीय पोपट मोरे हे शेतकरी गंभीर जखमी झाले आहेत.
तर याच परिसरातील देशमुख मळा भागात अशोक देशमुख यांचे घर देखील चोरट्यांनी फोडले असून दोन तोळे सोने चोरीला गेल्याची घटना घडली आहे तर काकडे वस्ती मधील नवनाथ देशमुख यांच्या बंगल्याला बाहेरून कडी लावण्याचा प्रकार घडला आहे. (Latest Pune News)
पोपट मोरे हे आपल्या राहत्या घरा समोर झोपलेले असताना अचानक आलेल्या या चोरट्यांनी त्यांच्यावर कोयत्याने वार केला. तर पोपट मोरे यांचे भाऊ बाळासाहेब मोरे यांना देखील चोरट्यांनी गळ्याला चाकू लावत धमकावले आरडाओरडा झाल्याने चोरटे पसार झाले. यातील जखमी पोपट मोरे यांच्यावर केडगाव मधील हॉस्पिटलमध्ये उपचार सुरू असून त्यांची प्रकृती स्थिर आहे.
घटनेची माहिती मिळताच घटनास्थळी स्थानिक गुन्हे अन्वेषण शाखेचे पोलीस निरीक्षक अविनाश शिळीमकर यवतचे पोलीस निरीक्षक नारायण देशमुख यांनी भेट दिली असून जखमींची विचारपूस केली आहे. तर याबाबत गुन्हा दाखल करून पुढील तपास केला जाईल असे पोलिस निरीक्षक नारायण देशमुख यांनी सांगितले.
