पुणे; पुढारी वृत्तसेवा : कमी वजनाच्या किंवा कमी दिवसांच्या बाळांना स्पेशल न्यू बॉर्न केअर युनिट (एसएनसीयू) अर्थात नवजात शिशू अतिदक्षता विभागात उपचार दिले जातात. खासगी रुग्णालयांमध्ये एसएनसीयूमधील उपचारांसाठी हाच एका दिवसाचा खर्च पाच ते सहा हजार रुपये इतका येतो. कमला नेहरू रुग्णालयात 20 खाटांचे एसएनसीयू कार्यरत असून, गेल्या वर्षभरात 1426 बालकांवर उपचार करण्यात आले आहेत. ही संख्या राज्यात सर्वाधिक आहे.
महापालिकेचे कमला नेहरू रुग्णालय, राजीव गांधी रुग्णालय, सोनावणे प्रसूतिगृह या तीन रुग्णालयांमध्ये निओनेटल इंटेन्सिव्ह केअर युनिट (एनआयसीयू) कार्यरत आहे. कमला नेहरू रुग्णालयात एसएनसीयू विभाग कार्यरत आहे. येथे व्हेंटिलेटर, ऑक्सिजन, फोटोथेरपी मशिन, रेडियंट वॉर्मर अशा सुविधा उपलब्ध आहेत.
कमी वजनाच्या, कमी दिवसांच्या बाळांना येथे आवश्यकतेनुसार एक ते दीड महिना उपचार दिले जातात. काही बाळांना जन्मत: कावीळ, शरीरातील साखरेचे प्रमाण वाढणे किंवा कमी होणे, श्वसनाचे विकार, फिट्स येणे, हृदयाचा विकार, व्यंग अशा आजारांवर एसएनसीयूमध्ये उपचार केले जातात, अशी माहिती बालरोगतज्ज्ञ आणि साहाय्यक वैद्यकीय अधीक्षक डॉ. स्मिता सांगडे यांनी दिली.
एनआयसीयूमधील उपचारांसाठी 'ट्रान्सफर प्लॅन'
नवजात बालकांना तातडीचे उपचार योग्यरितीने मिळावेत, यासाठी महापालिकेच्या आरोग्य विभागातर्फे 'ट्रान्सफर प्लॅन' तयार करण्यात आला आहे. त्यानुसार आजाराचे निदान झालेली बालके कोणत्या एनआयसीयूमध्ये दाखल करण्यात यावीत आणि गरज भासल्यास कोठे पाठवले जावे, याबाबत नियोजन करण्यात आले आहे.
उपचारांची सद्य:स्थिती
(जानेवारी 2022 ते जानेवारी 2023)
उपचार घेतलेल्या बालकांची संख्या – 1426
कमी दिवसांची/कमी वजनाची बालके-826
ऑक्सिजन/व्हेंटिलेटर सपोर्टची गरज-384
डोळ्यांची तपासणी-50
कावीळ झाल्यावर फोटोथेरपी-1036
मृत्यू – 33
शस्त्रक्रिया – 0
