पिंपरी : भाजपच्या बुथ सक्षमीकरण अभियानाचे पश्चिम महाराष्ट्र संयोजक व प्रदेश सरचिटणीस मुरलीधर मोहोळ यांनी चिंचवड विधानसभा मतदारसंघातील संघटनेचा आढावा घेतला. पक्षाने दिलेले सर्व कार्यक्रम ताकदीने यशस्वीपणे राबवा, असे आवाहन त्यांनी माजी नगरसेवक व शक्ती केंद्रप्रमुखांना शुक्रवारी (दि. 14) केले.
पिंपळेसौदागर येथे भाजपची चिंचवड विधानसभा मतदारसंघाची संघटनात्मक बैठक पार पडली. त्या प्रसंगी ते बोलत होते. या बैठकीला भाजप शहराध्यक्ष व आमदार महेश लांडगे, आमदार अश्विनी जगताप, माजी सत्तारूढ पक्षनेते नामदेव ढाके, संघटन सरचिटणीस अमोल थोरात, सरचिटणीस अॅड. मोरेश्वर शेडगे, माजी उपमहापौर झामाबाई बारणे, सचिन चिंचवडे यांच्यासह चिंचवड विधानसभा मतदारसंघातील भाजपचे सर्व माजी नगरसेवक व शक्तीकेंद्र प्रमुख उपस्थित होते.
मुरलीधर मोहोळ यांनी सर्व माजी नगरसेवक व शक्तीकेंद्र प्रमुखांना बुथ सक्षमीकरण अभियान, भारतरत्न डॉ. आंबेडकर यांच्या जयंतीनिमित्त सामाजिक न्याय सप्ताह, येत्या 30 एप्रिल रोजीचा देशाचे पंतप्रधान नरेंद्र मोदी यांचा 100 वा 'मन की बात' कार्यक्रमाचे आयोजन, पक्ष सदस्य नोंदणी अभियान या प्रमुख कार्यक्रमांसोबतच पक्षाचे अगामी सर्व कार्यक्रम व अभियानांची माहिती दिली.
तसेच चिंचवड विधानसभेतील चिंचवडगाव-किवळे मंडल व सांगवी-काळेवाडी या दोन्ही मंडलांचा संघटनात्मक व बुथ सक्षमीकरण अभियानाचा त्यांनी आढावा घेतला. पवना सहकारी बँकेच्या संचालकपदी निवडून आल्याबद्दल माजी उपमहापौर सचिन चिंचवडे यांचा तसेच बुथ सक्षमीकरण अभियानात आपले काम पूर्ण केल्याबद्दल माजी नगरसेवक संदीप कस्पटे, विनायक गायकवाड या दोघांचा विशेष सत्कार करण्यात आला
