पुणे: सावित्रीबाई फुले पुणे विद्यापीठाच्या महाराष्ट्र राज्यस्तरीय पात्रता परीक्षा (सेट) २०२६ च्या परीक्षेच्या तारखेत बदल करण्यात आला आहे. यापूर्वी दि. २७ सप्टेंबरला नियोजित असलेली ४४ वी सेट परीक्षा आता दि. २५ ऑक्टोबर २०२६ रोजी घेण्यात येणार असल्याची माहिती विद्यापीठाच्या सेट विभागामार्फत देण्यात आली आहे.
सावित्रीबाई फुले पुणे विद्यापीठाच्या सेट परीक्षा विभागाकडून सहाय्यक प्राध्यापक तसेच पी.एचडी.साठी सेट परीक्षा महाराष्ट्र आणि गोवा राज्यात घेण्यात येते. विद्यापीठाने यापूर्वी २७ सप्टेंबर रोजी परीक्षा घेण्याचे जाहीर केले होते.
परंतु, केंद्रीय लोकसेवा आयोगासह अन्य स्पर्धात्मक परीक्षांचे वेळापत्रक जाहीर झाल्याने परीक्षांच्या तारखांमध्ये मोठ्या प्रमाणावर एकाचवेळी येणारी स्पर्धा निर्माण झाली. त्यातच २५ सप्टेंबरला अनंत चतुर्दशी असल्याने उमेदवारांना प्रवास तसेच परीक्षा केंद्रावर वेळेत पोहोचताना अडचणी निर्माण होण्याची शक्यता होती. या पार्श्वभूमीवर परीक्षा विभागाकडे उमेदवारांकडून आलेल्या निवेदनांचाही विचार करण्यात आला.
उमेदवारांच्या हिताचा तसेच परीक्षा आयोजनातील सोयीचा विचार करून विद्यापीठाने पूर्वनियोजित परीक्षा पुढे ढकलण्याचा निर्णय घेतला. त्यानुसार आता दि. २५ ऑक्टोबर २०२६ रोजी ४४ वी महाराष्ट्र राज्यस्तरीय पात्रता परीक्षा (सेट) घेण्यात येणार आहे.
परीक्षेच्या तारखेत झालेला हा बदल सर्व संबंधित परीक्षार्थी, परीक्षा संपर्क प्रमुख तसेच परीक्षा आयोजनाशी संबंधित यंत्रणांना लागू राहणार आहे. उमेदवारांनी बदललेल्या तारखेची नोंद घेऊन त्यानुसार परीक्षेची तयारी आणि प्रवासाचे नियोजन करावे, असे आवाहन सेट परीक्षा विभागाकडून करण्यात आले आहे. या निर्णयामुळे सणासुदीच्या काळातील प्रवासाची संभाव्य अडचण टाळण्याबरोबरच उमेदवारांना परीक्षेच्या तयारीसाठीही अतिरिक्त वेळ मिळणार असल्याचे स्पष्ट झाले आहे.
