पुणे : खांबात उतरलेल्या विद्युत प्रवाहाच्या धक्क्याने आठ वर्षांच्या शाळकरी मुलीचा मृत्यू झाल्याची घटना नाना पेठेत रविवारी (दि. 1) घडली. या दुर्घटनेत आणखी एक मुलगा जखमी झाला असून, त्याची प्रकृती स्थिर असल्याची माहिती पोलिसांनी दिली.
सायली डंबे (वय 8, रा. डोके तालमीजवळ, नाना पेठ) असे मृत्युमुखी पडलेल्या मुलीचे नाव आहे. या घटनेत दुसरा मुलगा जखमी झाला असून, त्याची प्रकृती स्थिर असल्याची माहिती समर्थ पोलिस ठाण्याचे वरिष्ठ पोलिस निरीक्षक उमेश गित्ते यांनी दिली.
सायली डंबे आणि मुले रविवारी रात्री साडेदहाच्या सुमारास नाना पेठेतील डोके तालीम परिसरात खेळत होते. त्या वेळी इनामदार चौकातील एका खांबाला सायलीचा स्पर्श झाला. या खांबात विद्युत प्रवाह उतरला होता. सायली आणि तिच्याबरोबर असलेल्या एक मुलाला विजेचा धक्का बसला. हा प्रकार तेथून निघालेल्या एका बसचालकाने पाहिला. त्याने तत्परता दाखवून दोघांना लाकडी बांबूने ढकलले, अशी माहिती या भागातील नागरिकांनी दिली. दोघांना तातडीने खासगी रुग्णालयात दाखल करून उपचार करण्यात आले. उपचारांदरम्यान सायलीचा मृत्यू झाला. ही घटना उघडकीस आल्यानंतर नाना पेठ परिसरात शोककळा पसरली.
याप्रकरणी समर्थ पोलिस ठाण्यात अकस्मात मृत्यूची नोंद करण्यात आली आहे. शाळकरी मुलीचा विजेच्या धक्क्याने मृ्त्यूप्रकरणी महावितरण आणि महापालिकेच्या अधिकार्यांशी संपर्क साधला आहे. दुर्घटना नेमकी कशी घडली, याबाबतचा अहवाल महावितरणकडून आल्यानंतर चौकशी करून पुढील कारवाई करण्यात येणार आहे, असे पोलिस निरीक्षक गित्ते यांनी सांगितले.
