Retired Wing Commander house robbery
पुणे: भारतीय हवाई दलातून निवृत्त झालेल्या विंग कमांडरच्या घरातून दोघा चोरट्यांनी पहाटेच्या वेळी धमकावत हिरेजडित दागिने, 83 तोळे सोने, साडेसात लाख रुपयांची रोकड, दोन मोबाइल असा तब्बल 59 लाख 24 हजार रुपयांचा ऐवज लुटला. दरम्यान, चोरटे सीसीटीव्ही कॅमेर्यात कैद झाले असून, स्थानिक पोलिस आणि गुन्हे शाखेची पथके त्यांचा शोध घेत आहेत.
ही घटना मंगळवारी (दि.15) पहाटे अडीच ते सव्वातीन वाजताच्या सुमारास कौशाल्या बंगलो, अपंग शाळेसमोर वानवडी गावात घडली आहे. याप्रकरणी, वेरीन्दरकुमार रतनलाल जंडियाल (वय 78) यांनी वानवडी पोलिस ठाण्यात फिर्याद दिली आहे. त्यानुसार पोलिसांनी दोघा चोरट्यांच्या विरुद्ध गुन्हा दाखल केला आहे. (Latest Pune News)
पोलिसांनी दिलेल्या माहितीनुसार, फिर्र्यादी जंडियाल हे 1992 मध्ये भारतीय हवाई दलातून विंगकमांडर म्हणून सेवानिवृत्त झाले आहेत. तेव्हापासून ते वानवडी गाव येथे त्यांच्या कौशाल्या बंगल्यात वास्तव्यास आहेत. पत्नी, मुलगा आणि सून त्यांच्यासोबत ते राहतात. जंडियाल हे रियल इस्टेटचा व्यवसाय करतात, तर त्यांच्या मुलाचा ग्रिजली मोटार वर्क नावाने व्यवसाय आहे.
खालच्या मजल्यावर जंडियाल आणि त्यांच्या पत्नीची बेडरूम आहे, तर वरील मजल्यावर त्यांच्या मुलाची. सोमवारी रात्री अकरा वाजता जेवण झाल्यानंतर नेहमीप्रमाणे ते आपल्या खोलीत झोपले होते. पहाटे अडीच वाजता आवाजाने त्यांना जाग आली. त्यामुळे त्यांनी आवाजाची मशिन कानाला लावली.
त्या वेळी दोन व्यक्ती तोंडाला मास्क लावलेले तेथे होते. त्यांनी त्यांच्या अंगावरील चादर ओढली. धमकावून आलमारीची चावी मागितली. बेडसमोरील आलमारी हाताने ओढून त्यातील दागिने काढून घेतले. तुम्ही जर प्रेमाने आलमारीची चावी दिली, तर आम्ही तुम्हाला मारणार नाहीत, असे म्हटले.
त्यानंतर चोरट्यांनी त्यांच्याकडील स्क्रू ड्रायव्हरने आलमारीचा दरवाजा उचकटून रोकड काढून घेतली. तसेच जंडियाला आणि त्यांच्या पत्नीचा मोबाइल हिसकावून घेत, येथून हललात तर मारून टाकू, असे धमकावून पळ काढला. त्या वेळी पहाटेचे सव्वातीन वाजले होते. जंडियाल आणि त्यांच्या पत्नीने हॉलमध्ये येऊन पाहिले तेव्हा त्यांना हॉलचा ग्रिल दरवाजा तोडून चोरटे आत आल्याचे समजले. त्यानंतर त्यांनी आपला मुलगा आणि सुनेला आवाज देऊन झालेल्या प्रकाराची माहिती दिली.
पोलिसांच्या नियंत्रण कक्षाला फोन करून जंडियाला यांनी झाला प्रकार सांगितला. त्यानुसार वानवडी पोलिसांनी घटनास्थळी धाव घेतली. बंगल्याचे सीसीटीव्ही फुटेज पाहिले असता, दोघे चोरटे कॅमेर्यात कैद झाले आहेत. गुन्हे शाखा आणि स्थानिक पोलिसांची पथके आरोपीचा शोध घेत आहेत. चोरट्यांना पकडल्यानंतर हा प्रकार कसा घडला, हे स्पष्ट होईल, असे वरिष्ठ पोलिस अधिकार्यांनी सांगितले. घटनास्थळी पोलिस उपायुक्त डॉ. राजकुमार शिंदे, गुन्हे शाखेचे उपायुक्त निखिल पिंगळे, वरिष्ठ पोलिस निरीक्षक सत्यजित आदमाने यांनी भेट दिली.
पहाटेच्या वेळी वानवडी येथील एका सेवानिवृत्त विंग कमांडरच्या बंगल्यात हा प्रकार घडला आहे. बंगल्यात प्रवेश केलेल्या दोघा चोरट्यांनी पती-पत्नीला धमकावून सोने-हिर्याचे दागिने आणि रोकड असा 59 लाख 24 हजारांचा ऐवज लुटला आहे. स्थानिक पोलिस आणि गुन्हे शाखेच्या पथकाकडून आरोपींचा शोध सुरू आहे.
-डॉ. राजकुमार शिंदे, पोलिस उपायुक्त, परिमंडळ पाच
