पुणे: भारतीय हवामान विभागाने यंदा कमी पावसाचा अंदाज व्यक्त केल्याने उपलब्ध पाणीसाठ्याचा काटकसरीने वापर करण्यासाठी पुणे महापालिकेने कठोर पावले उचलली आहेत. महापालिका हद्दीत पिण्याच्या पाण्याचा गैरवापर रोखण्यासाठी विविध निर्बंध लागू करण्यात आले असून, नियमांचे उल्लंघन करणाऱ्यांवर १० हजार रुपयांचा दंड आकारण्यात येणार आहे.
वारंवार नियमभंग केल्यास संबंधितांविरुद्ध फौजदारी गुन्हा दाखल करण्याचाही इशारा प्रशासनाने दिला आहे. महापालिकेच्या अतिरिक्त आयुक्त पवनीत कौर यांनी हे आदेश दिले आहेत.
या आदेशानुसार, सार्वजनिक व खासगी वॉशिंग सेंटर पाणी कपातीच्या काळात बंद ठेवण्याचे निर्देश देण्यात आले आहेत, तसेच सार्वजनिक आणि खासगी स्विमिंग पूल तसेच खासगी उद्यानांसाठी पिण्याचे पाणी वापरण्यास बंदी घालण्यात आली आहे. वाहन धुणे, पदपथ आणि अंगण स्वच्छ करण्यासाठीही पिण्याचे पाणी वापरण्यास मनाई करण्यात आली आहे.
खासगी गृहनिर्माण संस्थांना सांडपाणी प्रक्रिया प्रकल्प (एसटीपी) कार्यान्वित करून त्यातील पाण्याचा वापर बागकाम व फ्लशिंगसाठी करणे बंधनकारक करण्यात आले आहे. पाण्याच्या टाक्या ओव्हर फ्लो होऊ नयेत, यासाठी ऑटोमॅटिक फ्लोट व्हॉल्व्ह बसविण्याच्या सूचना देण्यात आल्या असून, टाकी ओव्हरफ्लो झाल्यास १० हजार रुपयांचा दंड आकारला जाणार आहे.
बांधकामे आणि रस्त्यांच्या कामांसाठी पिण्याच्या पाण्याचा वापर करण्यासही बंदी घालण्यात आली आहे. अशा कामांसाठी केवळ एसटीपी, विहीर किंवा बोअरवेलचे पाणी वापरण्याचे आदेश देण्यात आले आहेत. नियमांचे उल्लंघन झाल्यास संबंधित बांधकाम तातडीने बंद करून दंडात्मक कारवाई केली जाणार आहे.
