खडकवासला: यंदा पावसाळा दीड महिना आधीच संपल्याने खडकवासला धरणसाखळीतील पाणीसाठ्याकडे पुणे शहर आणि जिल्ह्याचे लक्ष लागले आहे. पुढील वर्षी ऑगस्टपर्यंत पाणीपुरवठा करण्याचे उद्दिष्ट असल्याने राज्य सरकारच्या सूचनेनुसार पुण्यात पाणी बचतीची अंमलबजावणी सुरू झाली आहे.
शहराला बंदिस्त जलवाहिन्यांद्वारे दररोज ६१० क्युसेक पाणी घेणाऱ्या महापालिकेने गुरुवार (दि. १५) आणि शुक्रवार (दि. १६) या दोन दिवसांत ४४७ क्युसेक पाणी घेतले. गतवर्षी १६ ऑक्टोबर रोजी धरणसाखळीत २९.०६ टीएमसी म्हणजेच ९९.७० टक्के पाणीसाठा होता. यंदा शुक्रवारी (दि. १६) हा साठा २५.६६ टीएमसी म्हणजेच ८७.३४ टक्क्यांवर आला आहे.
त्यामुळे गतवर्षीच्या तुलनेत यंदा सुमारे साडेतीन टीएमसी पाण्याची तूट आहे. खडकवासला धरणाचे शाखा अभियंता वीरेश राऊत म्हणाले की, महापालिकेने दहा टक्के पाणी कपातीचा निर्णय घेतला आहे. त्यानुसार गुरुवार आणि शुक्रवारी नेहमीपेक्षा कमी पाणी घेण्यात आले. यामुळे पाण्याची बचत होण्यास मदत होईल.
शहरासह जिल्ह्यातील नागरिकांना मागणीनुसार पिण्याच्या पाण्याचा पुरवठा सुरू आहे. अल निनोच्या संभाव्य परिणामांच्या पार्श्वभूमीवर सरकारने पाण्याचा काटकसरीने वापर करण्याचा निर्णय घेतला आहे.
खडकवासला धरणातून शहर आणि जिल्ह्याला पिण्यासाठी तसेच शेतीसाठी पाणी सोडले जात आहे. त्यासाठी पानशेत आणि वरसगाव धरणांतून प्रत्येकी ६०० क्युसेक पाणी खडकवासला धरणात सोडले जात आहे. दरम्यान, धरणसाखळीतील पाणीसाठ्यात घट सुरूच आहे.
