पुणे : गुलटेकडी मार्केट यार्डातील तरकारी विभागात फळभाज्यांची आवक मागील आठवड्याच्या तुलनेत स्थिर आहे. त्या तुलनेतच मागणी आहे. त्यामुळे भेंडी आणि घेवडा वगळता सर्व फळभाज्यांचे भाव मागील आठवड्याच्या तुलनेत स्थिर आहेत.
नवरात्रोत्सवास प्रारंभ झाल्याने बाजारात बटाटा, हिरवी मिरची, रताळी, भुईमूग, भेंडीसह राजगिर्याच्या भाजीला मागणी वाढली आहे. बाजारात होत असलेल्या मागणीच्या तुलनेत आवक कमी पडल्याने भेंडी आणि घेवड्याच्या भावात दहा ते वीस टक्क्यांनी वाढ झाली असल्याचे मार्केट यार्डातील ज्येष्ठ अडतदार विलास भुजबळ यांनी सांगितले.(Latest Pune News)
येथील घाऊक बाजारात राज्याच्या विविध भागांसह परराज्यांतून सुमारे 90 ट्रक फळभाज्यांची आवक झाली. परराज्यांतून झालेल्या आवकमध्ये कर्नाटक, उत्तर प्रदेश, आंध्र प्रदेश येथून हिरवी मिरची 15 टेम्पो, इंदौर येथून गाजर 6 टेम्पो, कर्नाटक येथून कोबी 5 टेम्पो, आंध्र प्रदेश आणि तामिळनाडू येथून शेवगा 3 ते 4 टेम्पो, तामिळनाडू येथून तोतापुरी कैरी 100 क्रेटस, कर्नाटक येथून घेवडा 4, गुजरात, कर्नाटक येथून भुईमूग 5 ते 6 टेम्पो, मध्य प्रदेश येथून लसणाची सुमारे 10 ते 12 टेम्पो तर इंदौर, आग्रा, स्थानिक भागातून बटाटा 4 ते 5 टेम्पो इतकी आवक झाली.
स्थानिक भागातून झालेल्या आवकमध्ये सातारी आले सुमारे 400 ते 500 गोणी, भेंडी 5 ते 6 टेम्पो, गवार 4 ते 5 टेम्पो, टोमॅटो 8 ते 10 हजार क्रेटस, हिरवी मिरची 10 ते 12 टेम्पो, काकडी 7 ते 8 टेम्पो, फ्लॉवर 8 ते 10 टेम्पो, गाजर 4 ते 5 टेम्पो, कोबी 5 ते 6 टेम्पो, ढोबळी मिरची 8 ते 10 टेम्पो, भुईमुग शेंग 100 गोणी, मटार 500 ते 600 गोणी, तांबडा भोपळा 10 ते 12 टेम्पो, कांदा सुमारे 90 ते 100 ट्रक इतकी आवक झाली.
मेथी महागली, तर चाकवत व करडई स्वस्त
मार्केट यार्डात मेथीची आवक घटली आहे. मागील आठवड्यात 80 हजार जुडी आवक झालेल्या मेथीची आज (रविवार दि. 21) 30 हजार जुडीच आवक झाली. त्यामुळे घाऊक बाजारात मेथीच्या भावात जुडीमागे 8 रुपयांनी वाढ झाली आहे. घाऊक बाजारात मेथीला दर्जानुसार 12 ते 20 रुपये भाव मिळत आहे. तर किरकोळ बाजारात 20 ते 30 रुपये जुडी भावाने मेथीची विक्री होत आहे.
तर आवक वाढल्यामुळे चाकवत व करडईच्या भावात घाऊक बाजारात जुडीमागे अनुक्रमे 3 आणि 1 रुपयांनी घट झाली आहे. तर मागणी आणि पुरवठा यातील समतोलामुळे उर्वरित पालेभाज्यांचे भाव मागील आठवड्यात तुलनेत स्थिर आहेत. कोथिंबिरीची आवक मात्र मागील आठवड्याच्या तुलनेत वाढली आहे. मागील आठवड्यात सव्वा लाख आवक झालेल्या कोथिंबिरीची आज दीड लाख जुडी आवक झाली आहे.
