पुणे: पुणे जिल्ह्यातील महसूल विभागातील ग्राम महसूल अधिकारी, मंडळ अधिकारी, सहायक महसूल अधिकारी आणि महसूल सहायक यांच्या सर्वसाधारण बदल्यांची प्रक्रिया आज सोमवारी (दि.१५ जून) पार पडणार असून, एकूण २८५ कर्मचारी बदलीसाठी पात्र ठरले आहेत. जिल्हाधिकारी कार्यालयात समुपदेशना द्वारे ही प्रक्रिया राबविण्यात येणार आहे.
महाराष्ट्र शासकीय कर्मचाऱ्यांच्या बदल्यांचे अधिनियम २००५ तसेच शासनाच्या विद्यमान धोरणानुसार बदल्या केल्या जाणार आहेत. जिल्ह्यातील ९२९ मंजूर ग्राम महसूल अधिकारी पदांपैकी ८८२ पदे कार्यरत असून, त्यातील १०७ कर्मचारी बदलीपात्र आहेत.
याशिवाय, ५७ सहायक महसूल अधिकारी, ३४ मंडळ अधिकारी आणि ८७ महसूल सहायक यांचाही समावेश बदलीपात्र कर्मचाऱ्यांमध्ये आहे. जिल्हाधिकारी कार्यालयातील बहुउद्देशीय सभागृहात सकाळी १० वाजल्यापासून समुपदेशन प्रक्रिया सुरू होणार आहे. संबंधित कर्मचाऱ्यांना उपस्थित राहण्याचे निर्देश दिले असून, अनुपस्थित राहणाऱ्यांना उपलब्ध रिक्त पदांवर प्रशासकीय सोयीने पदस्थापना दिली जाणार आहे.
निवासी उपजिल्हाधिकारी ज्योती कदम यांनी सांगितले, की बदली प्रक्रिया पूर्णपणे पारदर्शक पद्धतीने आणि शासनाच्या नियमांनुसार राबविण्यात येत आहे. कर्मचाऱ्यांची पात्रता, अनुभव, कार्यक्षमता आणि उपलब्ध रिक्त पदांचा विचार करून समुपदेशनाद्वारे निर्णय घेतला जाणार आहे. कोणत्याही प्रकारचा बाह्य हस्तक्षेप किंवा दबाव सहन केला जाणार नाही.
दरम्यान, बदल्यांबाबत राजकीय अथवा इतर कोणत्याही प्रकारचा दबाव आणण्याचा प्रयत्न झाल्यास संबंधितांवर महाराष्ट्र नागरी सेवा (वर्तणूक) नियमांनुसार कारवाई केली जाईल, असा इशाराही प्रशासनाने दिला आहे.
