पुणे: पुणे रेल्वेस्थानकावर महसूल गुप्तवार्ता संचालनालयाच्या (डीआरआय) पुणे प्रादेशिक पथकाने मोठी कारवाई करीत तब्बल ३.४१ कोटी रुपयांचे अमली पदार्थ जप्त केले. याप्रकरणी मिझोराममधील ३२ वर्षीय महिलेला अटक केली आहे. तिच्याकडून ॲम्फेटामाइन, क्रिस्टल मेथ आणि एमडीएमएचा साठा जप्त केला असून, या कारवाईमुळे आंतरराज्यीय अमली पदार्थतस्करीचे मोठे रॅकेट उघड होण्याची शक्यता आहे. लालरेमलियानी (वय ३२, रा. रामह्लून, ऐझॉल, मिझोराम) असे अटक केलेल्या महिलेचे नाव आहे.
मिळालेल्या विशिष्ट माहितीच्या आधारे डीआरआयच्या अधिकाऱ्यांनी मंगळवारी (दि. २५ ऑगस्ट) पहाटे पुणे रेल्वेस्थानकावर सापळा रचला होता. दिल्लीतील हजरत निजामुद्दीन स्थानकावरून म्हैसूरकडे जाणाऱ्या स्वर्ण जयंती एक्स्प्रेसमधून प्रवास करणाऱ्या संशयित महिलेला फलाट क्रमांक ३ वर अडविण्यात आले.
राजपत्रित महिला अधिकाऱ्याच्या उपस्थितीत तिच्या सामानाची झडती घेतली असता २ हजार ५३२ ग्रॅम पांढऱ्या-पिवळ्या रंगाचा स्फटिकयुक्त पदार्थ आढळला. तसेच, ८७८ ग्रॅम विविध रंगांच्या गोळ्या सापडल्या. नार्कोटिक्स डिटेक्शन किटच्या तपासणीत हे पदार्थ अमली असल्याचे स्पष्ट झाले. जप्त केलेल्या अमली पदार्थांची बाजारातील किंमत सुमारे ३.४१ कोटी रुपये असल्याचे सांगण्यात आले.
अटक केलेली महिला लालरेमलियानी हिच्या चौकशीत तिने 'अशिमा' नावाच्या आफ्रिकी व्यक्तीच्या सांगण्यावरून अमली पदार्थांची वाहतूक करीत असल्याची माहिती दिली. तिकीट आणि बॅगची व्यवस्था अशिमानेच केली होती. म्हैसूरला पोहचल्यानंतर लोकेशन शेअर करून बॅग संबंधित व्यक्तीच्या ताब्यात देण्याच्या सूचना तिला दिल्या होत्या.
महिलेच्या मोबाईलची तपासणी केल्यानंतर तस्करीच्या रॅकेटशी संबंधित महत्त्वाचे धागेदोरे डीआरआयच्या हाती लागले आहेत. या प्रकरणात एनडीपीएस कायद्यान्वये गुन्हा दाखल केला असून, आरोपी महिलेला विशेष एनडीपीएस न्यायालयात हजर केले होते.
