पुणे: शहरातील अवैध गावठी पिस्तूल बाळगणाऱ्यांच्या विरुद्ध पोलिसांनी विशेष मोहीम हाती घेतली आहे. गेल्या १५ दिवसांत शहरातील विविध पोलिस ठाण्यांच्या हद्दीत करण्यात आलेल्या कारवाईत अवैध शस्त्रे बाळगणारे, खरेदी-विक्री करणारे अशा १७ आरोपींना अटक करण्यात आली आहे.
या कारवाईदरम्यान १२ अवैध गावठी पिस्तुले आणि १३ जिवंत काडतुसे जप्त करण्यात आली आहेत. संबंधित आरोपींविरोधात शस्त्र अधिनियमांतर्गत १० गुन्हे दाखल करण्यात आले आहेत. पोलिसांनी दिलेल्या माहितीनुसार, १ ते १५ जून २०२६ या कालावधीत कालेपडळ, भारती विद्यापीठ, डेक्कन, मांजरी, नांदेड सिटी, फुरसुंगी, सहकारनगर, येरवडा आणि लोहगाव पोलिस ठाण्यांच्या हद्दीत गुप्त माहितीच्या आधारे तसेच छापेमारी करून ही कारवाई करण्यात आली.
काही प्रकरणांत आरोपींकडून एकापेक्षा अधिक शस्त्रे आणि काडतुसे जप्त करण्यात आली असून, शहरात अवैध शस्त्रांची उपलब्धता अद्यापही कायदा व सुव्यवस्थेसाठी गंभीर आव्हान असल्याचे यातून स्पष्ट झाले आहे. गेल्या १५ दिवसांत समोर आलेल्या १० प्रकरणांमुळे पोलिसांची चिंता वाढली आहे.
तपासात जप्त करण्यात आलेल्या शस्त्रांचा वापर गंभीर गुन्ह्यांसाठी होऊ शकला असता, असे समोर आले आहे. शस्त्रे शहरात कोणत्या मार्गाने पोहोचत होती आणि त्यामागे नेमके कोण सक्रिय आहेत, याचा शोध पोलिस घेत आहेत. दरम्यान, आगामी काळातही ही कारवाई सुरू राहणार असून, अवैध शस्त्रांच्या व्यापाराशी संबंधितांवर कठोर कारवाई केली जाईल, असा दावा पोलिसांनी केला आहे.
सहा महिन्यांत ६७ गुन्हे; ९६ पिस्तुले जप्त
पुणे पोलिसांच्या आकडेवारीनुसार, १ जानेवारी ते १५ जून २०२६ या कालावधीत अवैध शस्त्रांशी संबंधित एकूण ८७ गुन्हे दाखल करण्यात आले आहेत. या काळात पोलिसांनी ९६ अवैध पिस्तुले आणि १३६ काडतुसे जप्त केली असून १६१ आरोपींना अटक करून कारागृहात पाठवले आहे. या आकडेवारीवरून अवैध शस्त्रांविरोधात पोलिसांनी सातत्याने मोहीम राबविल्याचे दिसून येते. गुन्हेगार शस्त्रांच्या आधारे आपले बेकायदेशीर उद्योग वाढविण्याचा प्रयत्न करत असल्याचे स्पष्ट होत आहे. मात्र, पोलिसांच्या सतर्क आणि प्रभावी कारवाईमुळे त्यांच्या हालचालींवर मर्यादा येत असल्याचे चित्र आहे.
