पुणे: सार्वजनिक ठिकाणी अस्वच्छता निर्माण करणे तसेच सांडपाणी अनधिकृतपणे ड्रेनेजलाइन आणि नाल्यात सोडल्याप्रकरणी महापालिकेच्या कसबा पेठ क्षेत्रीय कार्यालयाने सॅलिसबरी पार्क परिसरातील दोन बेकरींवर एकूण ५० हजार रुपयांचा दंड ठोठावला. गोल्डन बेकरी आणि इंडियन बेकरी या दोन्ही आस्थापनांकडून प्रत्येकी २५ हजार रुपये दंडाची रक्कम जागेवरच वसूल करण्यात आली.
कसबा पेठ क्षेत्रीय कार्यालयाच्या हद्दीतील प्रभाग क्रमांक २२, २३ आणि २४ मध्ये बुधवारी संयुक्त तपासणी मोहीम राबविण्यात आली. या मोहिमेदरम्यान सॅलिसबरी पार्कमधील गोल्डन बेकरी आणि इंडियन बेकरीची पाहणी करण्यात आली. तपासणीवेळी दोन्ही आस्थापनांकडून सार्वजनिक ठिकाणी अस्वच्छता केली जात असल्याचे, तसेच सांडपाणी थेट ड्रेनेजलाईन आणि नाल्यात सोडले जात असल्याचे निदर्शनास आले. यानंतर महापालिकेने तातडीने दंडात्मक कारवाई करत दोन्ही बेकरींकडून प्रत्येकी २५ हजार रुपये दंड वसूल केला.
ही कारवाई घनकचरा व्यवस्थापन विभागाचे उपआयुक्त संतोष वारुळे, परिमंडळ क्रमांक ५ चे उपआयुक्त माधव जगताप आणि कसबा पेठ क्षेत्रीय कार्यालयाचे सहाय्यक आयुक्त तिमय्या जगले यांच्या मार्गदर्शनाखाली करण्यात आली. वरिष्ठ आरोग्य निरीक्षक राहुल राजगोळकर तसेच आरोग्य निरीक्षक अमोल लांडगे, तौसिफ देशपांडे आणि चंद्रवदन गायकवाड यांच्या पथकाने प्रत्यक्ष पाहणी करून ही कारवाई केली.
स्वच्छता नियमांचे उल्लंघन करणाऱ्या व्यावसायिक आणि नागरिकांविरोधात यापुढेही अशाच प्रकारच्या कठोर कारवाया सुरू राहतील, असा इशारा महापालिका प्रशासनाने दिला आहे. शहर स्वच्छ आणि आरोग्यदायी ठेवण्यासाठी नागरिक तसेच व्यावसायिकांनी स्वच्छता नियमांचे काटेकोर पालन करून महापालिकेला सहकार्य करावे, असे आवाहन प्रशासनाने केले आहे.
