पुणे: महापालिकेच्या शाळांमधील प्रशासकीय स्थितीबाबत धक्कादायक माहिती समोर आली आहे. महापालिकेच्या मराठी माध्यमातील 80 आणि उर्दू माध्यमातील 11 अशा एकूण 91 शाळांमध्ये सध्या मुख्याध्यापकपदे रिक्त असल्याचे पालिकेच्या सर्वसाधारण सभेतील प्रश्नोत्तरातून उघड झाले आहे.
महापालिकेत गेल्या चार वर्षांपासून प्रशासक राजवट होती. त्यानंतर अलीकडेच महापालिका निवडणुका होऊन सभागृह पुन्हा अस्तित्वात आले आहे. सभागृह सुरू झाल्यानंतर सर्वसाधारण सभेतील प्रश्नोत्तरांचा क्रम पुन्हा सुरू झाला असून, त्यातून ही माहिती समोर आली. भाजपचे नगरसेवक योगेश मुळीक यांनी महापालिकेच्या शाळांमधील मुख्याध्यापक पदांच्या रिक्त जागांबाबत प्रशासनाकडे माहिती मागितली होती. त्यावर प्रशासनाने दिलेल्या लेखी उत्तरात मराठी माध्यमातील 80 आणि उर्दू माध्यमातील 11 अशा एकूण 91 शाळांमध्ये मुख्याध्यापक नसल्याचे स्पष्ट केले आहे.
दरम्यान, महापालिकेच्या माध्यमिक व तांत्रिक शिक्षण विभागाकडे एकूण 43 शाळा आहेत. त्यापैकी 18 शाळा अनुदानित असल्याची माहितीही प्रशासनाने दिली. मुख्याध्यापक पदे भरण्याबाबत पदोन्नती प्रक्रियेच्या संदर्भात सर्वोच्च न्यायालयाच्या आदेशांचा विचार करून पुढील कार्यवाही सुरू असल्याचे प्रशासनाने नमूद केले आहे. येत्या नवीन शैक्षणिक वर्ष सुरू होण्यापूर्वी ही प्रक्रिया पूर्ण करण्याचा प्रयत्न करण्यात येणार असल्याचेही महापालिका प्रशासनाने आपल्या लेखी उत्तरात स्पष्ट केले आहे.
