Pune Market Update:
पुणे : जिल्ह्यासह राज्यभरात काही ठिकाणी अवकाळी पाऊसाने हजेरी लावली आहे. तर काही ठिकाणी उन्हाळ्यामुळे पाणीटंचाई निर्माण झाल्यामुळे उत्पादन घटले आहे. परिणामी, मार्केट यार्डात फळभाज्यांची रोडावलेली आवक ‘जैसे थे’ आहे. रविवारी (दि. 18) राज्याच्या विविध भागांसह परराज्यांतून सुमारे 80 ते 90 ट्रक फळभाज्यांची आवक झाली.
बाजारात दाखल झालेल्या मालाच्या तुलनेत मागणी वाढल्याने फ्लॉवर, ढोबळी मिरची, टोमॅटो आणि मटारच्या भावात 10 ते 20 टक्क्यांनी वाढ झाली आहे. मागणी आणि पुरवठा यातील समतोलामुळे उर्वरित फळभाज्यांचे भाव मागील आठवड्याच्या तुलनेत स्थिर होते. (Pune News Update)
परराज्यांतून झालेल्या आवकमध्ये कर्नाटक, गुजरात आणि उत्तरप्रदेश येथून हिरवी मिरची सुमारे 14 ते 15 टेम्पो, कर्नाटक आणि गुजरात येथून कोबी 4 ते 5 टेम्पो, आंध्र प्रदेश आणि तामिळनाडू येथून शेवगा 2 ते 3 टेम्पो, कर्नाटक आणि गुजरात येथून घेवडा 2 ते 3 टेम्पो, कर्नाटक येथून 1 टेम्पो भुईमुग शेंग, हिमाचल प्रदेश 2 टेम्पो मटार, कर्नाटक येथून पावटा 2 ते 3 टेम्पो, आंध्रप्रदेश आणि तामिळनाडू येथून कैरी 3 ते 4 टेम्पो, मध्यप्रदेश येथून लसूणाची सुमारे 8 ते 10 टेम्पो तर इंदौर, आग्रा, स्थानिक भागातून मिळून बटाट्याची 40 ते 45 टेम्पो इतकी आवक झाली.
स्थानिक भागातून झालेल्या आवकमध्ये सातारी आले सुमारे 500 ते 600 गोणी, भेंडी 5 ते 6 टेम्पो, गवार 4 ते 5 टेम्पो, टोमॅटो 5 ते 6 हजार पेटी, हिरवी मिरची 4 ते 5 टेम्पो, काकडी 5 ते 6 टेम्पो, फ्लॉवर 7 ते 8 टेम्पो, कोबी 5 ते 6 टेम्पो, ढोबळी मिरची 8 ते 10 टेम्पो, शेवगा 2 टेम्पो, गाजर 4 ते 5 टेम्पो, भुईमुंग शेंग 50 ते 60 गोणी, तांबडा भोपळा 10 ते 12 टेम्पो, कांदा सुमारे 75 ते 80 टेम्पो इतकी आवक झाली.
मार्केट यार्डातील घाऊक बाजारात कोथिंबिरीची आवक घटली आहे. जिल्ह्यासह विभागात पाऊसाने हजेरी लावल्यामुळे ही आवक घटली आहे. त्यामुळे घाऊक बाजारात कोथिंबिरीच्या भावात जुडीमागे 5 रुपयांनी वाढ झाली आहे. घाऊक बाजारात दर्जानुसार जुडीला 15 ते 20 रुपये भाव मिळत आहे. तर किरकोळ बाजारात 20 ते 30 रुपयांनी विक्री होत आहे. याबरोबरच अंबाडी आणि चुकाच्या भावात घाऊक बाजारात जुडीमागे 1 रुपयांनी वाढ झाली आहे. तर, मेथीची आवक मागील आठवड्याच्या तुलनेत दुप्पट झाली आहे. मागील आठवड्यात 30 हजार जुडी आवक असलेल्या मेथीची 60 हजार जुडी आवक झाली. परिणामी, मेथीच्या भावात घाऊक बाजारात जुडीमागे 10 रुपयांनी घट झाली आहे. घाऊक बाजारात मेथीच्या जुडीला 12 ते 15 रुपये भाव मिळत आहे. याबरोबरच पुदीना आणि चवळईच्या भावात जुडीमागे 1 रुपयांनी घट झाली आहे. मागील आठवड्यात 1 लाख जुडी आवक झालेल्या कोथिंबिरीची आज 80 हजार जुडी आवक नोंदविण्यात आली.
