मंचर : ग्रामीण भागातील दळणवळणाचा मुख्य आधार असलेल्या एसटीला गेल्या काही महिन्यांत नवीन गाड्या मिळाल्या आहेत. परंतु, त्या तुलनेत चालक आणि वाहकांची संख्या पुरेशी नसल्याने अनेक गाड्या धावू शकत नाहीत, अशी स्थिती आहे. चालक-वाहकांच्या कमतरतेचा फटका दिवाळीच्या काळात प्रवाशांना बसण्याची चिन्हे आहेत. यामुळे प्रवाशांची गैरसोय होणार आहे.(Latest Pune News)
चालक-वाहकांच्या कमतरतेमुळे अतिरिक्त फेऱ्या, जास्त वेळ काम करावे लागल्याने चालक-वाहकांची मानसिकता बिघडत आहे. त्यांच्यावर कामाचा ताण येत असल्याने त्यांना थकवा जाणवत असल्याचे काहींनी सांगितले. पुणे विभागात कोविडपूर्वी 1,100 एसटी गाड्या होत्या. सध्या फक्त 850 एसटी गाड्या उपयुक्त स्थितीत आहेत. या विभागाला सुमारे 200 वाहकांची गरज असल्याचे सांगण्यात आले. राज्यातील एकूण एसटी गाड्यांची संख्या अंदाजे सुमारे 15 हजार 500 ते 16 हजार दरम्यान असून जवळपास अंदाजे 3 हजार एसटी चालक-वाहकांची कमतरता असल्याचे समोर आले आहे.
राज्यातील एसटी आगारांना गेली तीन महिन्यांपासून नवीन एसटी गाड्या वितरित झाल्या. परंतु, वाहकांची मोठी कमतरता आहे. दिवाळी काळात प्रवाशांची गर्दी वाढणार आहे. चालक-वाहकांवरही वाढीव फेऱ्यांवर मयार्दा आहेत. आठ तास ड्रायव्हर काम करतात, त्यानंतर विश्रांतीची गरज असते, पण सध्या ताण अधिक असल्यामुळे त्यांचे आरोग्य आणि सुरक्षा दोन्ही धोक्यात येत आहे.
सध्या एसटी चालक-वाहकांची भरती नाही. करारावरच्या किंवा तात्पुरत्या चालक-वाहकांना कामावर घेण्याचा मार्ग एसटीने अवलंबिला आहे. कर्मचाऱ्यांच्या अपुऱ्या संख्येवर तातडीने कार्यवाही करणे गरजेचे आहे. एसटी गाड्या असून पण चालक-वाहक नसल्याने त्या आगारातच उभ्या आहेत.
नवीन गाड्या आहेत, परंतु चालक-वाहक पुरेशा प्रमाणात नाहीत. दिवाळीत प्रवाशांची गैरसोय होणार आहे. चालक-वाहकांची विश्रांती, वेळेचे नियोजन करणे गरजेचे आहे. अतिरिक्त कामामुळे अपघात होण्याची भीती आहे.
संजय पवळे, सरपंच, पेठ
सद्य:स्थितीत मंचर एसटी आगारात एकूण बसगाड्या 33, त्यामध्ये नवीन एसटी बसगाड्या 10, जुन्या 23 असून चालक 86 तर वाहक 45 आहेत. या आगारात 20 वाहकांची कमतरता आहे.
प्रवीण मोरडे, उद्योजक, मंचर
एसटी गाड्यांची संख्या वाढली आहे, ही बाब समाधानकारक आहे. मात्र त्या तुलनेत गाड्या धावत नाहीत. चालक-वाहक भरतीची केवळ घोषणा झाली आहे. सुट्ट्यांमध्ये प्रवाशांची गर्दी वाढते; सेवा सुरळीत राहिली पाहिजे, यासाठी महामंडळाने प्रयत्न करावा.
