Pune Heavy Rain Traffic Advisory: पुणे शहरात सकाळपासून सुरू असलेल्या मुसळधार पावसामुळे अनेक भागांमध्ये पाणी साचले असून वाहतुकीचा वेग मोठ्या प्रमाणात मंदावला आहे. अनेक प्रमुख रस्त्यांवर वाहतूक कोंडीची परिस्थिती निर्माण झाली असून अपघाताचा धोकाही वाढला आहे. या पार्श्वभूमीवर पुणे वाहतूक पोलिसांनी नागरिकांना शक्यतो अनावश्यक प्रवास टाळण्याचे आणि अत्यावश्यक काम असेल तरच घराबाहेर पडण्याचे आवाहन केले आहे.
पुणे वाहतूक पोलिसांनी दिलेल्या माहितीनुसार, दुपारी 2 वाजेपर्यंत शहरातील वाहतुकीचा सरासरी वेग कमी झाल्याचे दिसून आले आहे.
सकाळी सरासरी वेग : 21.8 किमी प्रतितास
दुपारी सरासरी वेग : 20.7 किमी प्रतितास
रस्त्यांवर पाणी साचल्यामुळे वाहनांची गती मंदावली असून अनेक ठिकाणी वाहतुकीवर परिणाम झाला आहे.
पावसामुळे काही भाग अतिसंवेदनशील ठरले असून येथे पाणी साचण्याची शक्यता अधिक आहे. त्यामुळे या मार्गांवरून प्रवास करताना विशेष काळजी घेण्याचे आवाहन करण्यात आले आहे.
शिवाजीनगर – संचेती चौक
स्वारगेट परिसर
हडपसर – मगरपट्टा रोड
पुणे रेल्वे स्थानक परिसर
खडकी – डेक्कन – बंड गार्डन रोड
कात्रज – एनडीए रोड
मुंढवा – कोरेगाव पार्क रोड
पुणे वाहतूक पोलिसांनी नागरिकांना काही महत्त्वाच्या सूचनांचे पालन करण्याचे आवाहन केले आहे.
चौक, बसथांबे, उड्डाणपूल, पादचारी क्रॉसिंग किंवा पाणी साचलेल्या ठिकाणी वाहन उभे करू नका.
चुकीच्या दिशेने वाहन चालवू नका.
लेन कटिंग आणि अचानक ब्रेक मारणे टाळा.
शक्य असल्यास सार्वजनिक वाहतूक, कारपूल किंवा शेअर ऑटोचा वापर करावा.
वाहतूक पोलिसांच्या सूचनांचे, डिजिटल बोर्डवरील संदेशांचे आणि मार्गदर्शक फलकांचे काटेकोरपणे पालन करावे.
पावसाळ्यात वाहन चालवताना अतिरिक्त काळजी घेणे आवश्यक असल्याचे पोलिसांनी सांगितले आहे.
शक्यतो अनावश्यक प्रवास टाळा.
सकाळ आणि संध्याकाळच्या गर्दीच्या वेळेत बाहेर पडणे टाळा.
घराबाहेर पडण्यापूर्वी हवामान आणि वाहतुकीची अद्ययावत माहिती तपासा.
पाण्याची खोली माहिती नसलेल्या रस्त्यांवरून वाहन नेऊ नका.
पाण्यातून वाहन चालविण्याचा धोका पत्करू नका.
वाहन चालवताना सुरक्षित अंतर ठेवा.
हेडलाईट सुरू ठेवून सावकाश वाहन चालवा.
वाहतुकीवरील ताण कमी करण्यासाठी पुणे मेट्रो, पीएमपीएमएल बस, शेअर ऑटो आणि कारपूल यांचा जास्तीत जास्त वापर करण्याचे आवाहन करण्यात आले आहे. यामुळे वाहतूक कोंडी कमी होण्यास मदत होईल आणि नागरिकांचा प्रवासही अधिक सुरक्षित होईल.
पुणे वाहतूक पोलिसांनी नागरिकांना संयम बाळगण्याचे, नियमांचे पालन करण्याचे आणि वाहतूक सुरळीत ठेवण्यासाठी प्रशासनाला सहकार्य करण्याचे आवाहन केले आहे. मुसळधार पावसाच्या परिस्थितीत थोडासा निष्काळजीपणाही अपघातास कारणीभूत ठरू शकतो. त्यामुळे प्रत्येक नागरिकाने जबाबदारीने वाहन चालवून स्वतःची आणि इतरांची काळजी घ्यावी.
