पुणे: सार्वजनिक गणेशोत्सवाची परंपरा पुण्याने महाराष्ट्रालाच नव्हे, तर देशाला दिली आहे. सव्वाशे वर्षांहून अधिक काळाची ही परंपरा जपत पुण्याचा गणेशोत्सव दणक्यात आणि जल्लोषातच साजरा झाला पाहिजे. मात्र, उत्सवाचा पारंपरिक बाज कायम ठेवताना डीजे संस्कृतीला थारा देता कामा नये. नागरिकांना त्रास होणार नाही, अशा मर्यादेत स्पीकरला परवानगी देण्यास हरकत नाही; परंतु डीजेची पाठराखण काँग्रेस करणार नाही, अशी स्पष्ट भूमिका काँग्रेसचे शहराध्यक्ष प्रशांत जगताप यांनी दै. 'पुढारी'शी बोलताना मांडली.
जगताप म्हणाले, की पुण्याच्या गणेशोत्सवाची ओळख ही पारंपरिक वाद्ये, ढोल-ताशांचा गजर आणि शिस्तबद्ध मिरवणुकांमुळे आहे. या परंपरेला धक्का न लावता उत्सव साजरा झाला पाहिजे. गणेश मंडळांचे मंडप, स्वागत मिरवणूक, विसर्जन मिरवणूक, तसेच वर्षानुवर्षे चालत आलेले पारंपरिक मिरवणूक मार्ग यामध्ये अनावश्यक बदल करू नयेत. डीजेच्या कर्णकर्कश आवाजामुळे अनेकांच्या श्रवणक्षमतेवर परिणाम झाला आहे.
त्यातून सामाजिक भानही हरपत चालले असून, काही चुकीच्या प्रकारांनाही चालना मिळते. त्यामुळे डीजेला आमचा ठाम विरोध राहील. पुण्याच्या गणेशोत्सवाचा जल्लोष आणि भव्यता कमी होणार नाही, तसेच नागरिकांनाही त्रास होणार नाही, अशा पद्धतीने पारंपरिक वाद्यांसह मर्यादित ध्वनियंत्रणेला परवानगी देता येऊ शकते. यासाठी राज्य सरकार, प्रशासन, पोलिस आणि गणेश मंडळांच्या कार्यकर्त्यांनी एकत्रितपणे पुढाकार घेऊन योग्य तो समन्वय साधावा, असेही जगताप यांनी सांगितले.
'डीजेचा उन्माद गणेशोत्सवाला गालबोट लावतोय'
पुण्याच्या गणेशोत्सवाला मोठी ऐतिहासिक आणि सांस्कृतिक परंपरा आहे. मात्र, अलीकडच्या काळात वाढलेला डीजेचा उन्माद या वैभवशाली उत्सवाला बदनाम करीत आहे. कर्णकर्कश आणि अतितीव्र आवाजामुळे नागरिकांच्या श्रवणक्षमतेवर गंभीर परिणाम होण्याचा धोका असून, कानाच्या पडद्याला इजा होण्यासह विविध आरोग्यविषयक समस्या निर्माण होऊ शकतात.
विशेषतः तरुण पिढी सातत्याने अशा प्रचंड आवाजाच्या संपर्कात येत असल्याने त्यांच्या आरोग्यावर दीर्घकालीन परिणाम होण्याची भीती आहे. उत्सवाचा आनंद आणि जल्लोष जरूर असावा; मात्र तो नागरिकांच्या आरोग्याची किंमत मोजून नको. पारंपरिक वाद्यांच्या गजरात पुण्याची गणेशोत्सवाची परंपरा जपत डीजेच्या उन्मादाला वेळीच आवर घालणे आवश्यक आहे. अन्यथा पुण्याची ओळख असलेल्या या सांस्कृतिक उत्सवाला डीजेमुळे गालबोट लागत राहील.
